單鍵

價鍵理論嘅單鍵係種共價鍵，兩個原子成單鍵會共享一對電子。單鍵係最常見嘅共價鍵類型。同雙鍵、三鍵等多重鍵唔同，單鍵一般可以自由旋轉。單鍵一般會比同種原子形成嘅多重鍵長。兩個相同原子形成嘅單鍵鍵長嘅一半叫做嗰種原子嘅共價半徑。

好多非金屬單質都係完全由單鍵組成，包括氫氣、所有鹵素單質、金剛石、硅晶體等等。其它衹包括單鍵嘅常見物質包括水、氨、甲烷、乙醇、氯化氫等等。

單鍵基本上都係 σ 鍵，B₂ 分子係一個例外。

有機化學

喺有機化學入面，成日會聽到一樣叫碳-碳單鍵嘅嘢，其實就係兩個碳原子共用一對電子嘅情況，而如果成個有機化合物入面只係有碳-碳單鍵同埋碳-氫單鍵嘅話，就算係烷烴，好似甲烷、乙烷、丙烷等等。而喺有機化合物入面常見嘅C-H、O-H、N-H、C-C、C-Cl鍵等，其實都屬於σ鍵。