共價鍵

共價鍵係種化學鍵，通過兩個或者好多個非金屬原子一齊用外層電子（即係電子對）後形成。咁樣就可以達到八隅體，好穩定。

氫嘅共價鍵

分類

通常共價鍵有分三類：

• σ鍵（就係原子軌道頭對頭重叠，好似有機化合物入面嘅單鍵咁）
• π鍵（就係原子軌道突出來嘅位重叠）
• δ鍵（就係兩個d軌域四層重叠，通常係有機金屬化合物入面會出現）

喺有機化學入面，重有樣嘢叫單鍵、雙鍵同三鍵，通常用一、兩或者三條綫表示，代表兩個原子之間共用咗幾多粒（對）電子。

配位共價鍵

配位共價鍵，通常簡稱配位鍵，講嘅係兩個原子共用緊嘅電子，其實係由一個原子供應嘅。好似一氧化碳噉樣，如果碳同氧之間得雙鍵，噉碳未夠八粒電子，所以氧供應一對電子畀碳，就係所謂配位鍵啦。重有水合氫離子、銨離子等例子。

極性

喺氧氣、氯氣等氣體入面，渠組成嘅原子係一樣（都係氧、氯等）。但如果渠組成嘅原子唔同（好似鹽酸入面有氫同氯），咁因爲渠嘅電負性有唔同，所以會搞到共用嘅電子被其中一個原子吸引，電荷分佈得唔夠均衡，分子就會有極性啦。好似鹽酸咁，氯電負性比較大，搶嗮人哋嘅電子，搞到有咗部分負電荷；而分子入面嘅氫，就有咗部分正電荷。電子明顯偏向氯嗰邊，所以鹽酸係個極性分子。