嗇色園
嗇色園係香港一間宗教慈善團體，喺1921年創立，係香港黃大仙祠嘅管理機構，除咗供奉黃大仙之外，亦尊崇儒、釋、道三教，並以「普濟勸善」為宗旨，廣推善行，辦理醫療、教育、安老扶幼等事務。
歷史 編輯
嗇色園喺1921年成立，係管理廟宇黃大仙祠嘅機構。成立初期係私人潛修嘅道場，只限道侶同家屬入去參拜。直至1934年，經過向政府申請之後先至獲准喺每年嘅農曆正月開放大殿；到1956年先獲准全面開放。嗇色園以「普濟勸善」為宗旨，積極拓展各項善業，喺創園後嘅第三年開始，就提供免費中醫贈診送藥服務，自1965年註冊為慈善社團法人後更大力發展其他公益服務，包括教育、安老、醫療等範疇。
屬下組織 編輯
教育服務 編輯
嗇色園喺1969年開辦第一間學校，而家開咗4間資助中學、3間資助小學、1間連貫式中小學、7間非牟利幼稚園、1間自然教育中心暨天文館，同2個生物科技教育服務項目。學生人數逾萬人，教職員亦都有800幾人。嗇色園主辦嘅所有學校，都用「可」字做個名。
中學 編輯
| 學校名稱 | 開辦年份 | |
|---|---|---|
| 1 | 嗇色園主辦可立中學 | 1969年 |
| 2 | 嗇色園主辦可風中學 | 1974年 |
| 3 | 嗇色園主辦可道中學 | 1990年 |
| 4 | 嗇色園主辦可藝中學 | 1991年 |
| 5 | 嗇色園主辦可譽中學暨可譽小學（中學部） | 1997年 |
小學 編輯
| 學校名稱 | 開辦年份 | |
|---|---|---|
| 1 | 嗇色園主辦可信學校 | 1975年 |
| 2 | 嗇色園主辦可銘學校 | 1992年 |
| 3 | 嗇色園主辦可立小學 | 1996年 |
| 4 | 嗇色園主辦可譽中學暨可譽小學（小學部） | 2003年 |
「嗇」「色」意思 編輯
「嗇」係慳吝嘅意思，而「色」可以解作「所好之物」、「有欲之類」。嗇色兩個字，有愛精神、致虛靜、省思慮、寡情欲嘅要義，包含導人悟道修真嘅意思。
使命 編輯
- 宣道弘法：推廣道教文化精粹，教化心靈，度人平安。
- 育才興學：提供平等、優質教育，啟發學生潛能，培養正直健康新一代。
- 安老護耆：推動多元化安老服務，讓長者安享豐盛晚年，老有所依。
- 救疾扶傷：為有需要社群提供適切支援，以助困厄、扶無依，關懷群眾嘅疾苦。
