專有名詞

專有名詞（粵拼：zyun1 jau5 ming4 ci4；英文：proper noun），簡稱專名，又叫固有名詞（日式中文），係名詞嘅一種，指隻名詞係指緊一件特定嘅物體，例如「歐洲」（指緊一笪地方）、「阿莊」（指緊一個人）或者「微軟」（指緊一間企業）都係固有名詞。

相比之下，普通名詞（common noun）係指緊一類嘅物體，例如「大陸」、「人類」同「企業」都係普通名詞。

標點符號

内文：專名號同書名號

現代中文有專名號及書名號，一共兩種用於專有名詞嘅標點符號；後者會用嚟標示文藝作品等嘅名，其他嘅就只可能會用前者標示。佢哋嘅用法，以下列兩類為主。

傳統式

當取此風格，文字橫排時，底綫式專名號及底綫式書名號皆會用到，每逢遇到專有名詞彼此連接，佢哋嘅底綫都要稍為分開；文字直排時，啲綫會劃喺啲字嘅左邊。由於佢同好多電子系統唔相容，現時已經式微，不過仍然會用於部分繁（／正）體字教科書及加咗其他現代標點符號嘅古文，基礎教育亦會將此傳授予學生。

流行式

取此風格時，無論文字係橫排定係直排，都唔用專名號，只用前後括號式書名號。現時佢喺所有中文地區都好流行，無論文字係以電子檔案定係印刷品形式出現，原因之一係電子系統擅長處理佢哋；同樣嘅幾個符號，按大陸及台灣標準，用法分別頗大。香港及澳門都主要用繁（／正）體字，政府揀咗大陸嗰套標點風格而民間就鍾意跟台灣。