埞方

喺地理學嚟講，埞方（粵音：deng6 fong1）又或者嗌地方（粵音：dei6 fong1），而精確啲嘅仲有得嗌位置（粵音：wai6 zi3），係用嚟表示地球表面嘅某個地區（亦可以係點、線或者區域）。有人喺度住嘅埞方就嗌做聚居地（settlement）。埞方有陣時係相對嘅，某樣嘢喺邊個埞方係要同第樣嘢比較出嚟嘅。呢種比較唔一定要極之具體，但係足以知道每笪埞方嘅絕對位置係喺邊度，正因為噉所以當喺遊埠同埋送貨嗰陣呢種比較方式係畀人廣泛噉用。譬如，中國係喺亞洲東面，而香港喺中國大陸嘅南面，澳門又喺香港隔離。噉樣比較之下，三笪地方嘅位置都清晰易明。