壓歲錢
壓歲錢係指中國春節時長輩送畀未成年晚輩嘅紅包。到咗大清，先有兒童慶歲，長者與以錢，貫用紅，置之臥所，曰「壓歲錢」。去到中華民國，又曾經流行以紅紙包100銅元，以示「長命百歲」[1]。
起源
編輯壓歲錢嘅起源主要有以下三種講法：
- 古時候，有種小妖叫做「祟」，年卅晚出嚟用手去摸瞓着咗嘅細路嘅頭，細路往往嚇到喊，跟住頭疼發熱，變成傻仔。因此，家家都響嗰日着燈坐喺度唔瞓，叫做「守祟」。有一家夫妻老年得到嗰仔，視佢為心肝寶貝。到咗年卅晚，佢哋驚「祟」嚟害個細路，就摞出八個銅錢同細路玩。細路玩攰瞓着咗，佢哋就將八個銅錢用紅紙包住放喺細路嘅枕頭下邊，兩公婆唔敢瞌埋眼。半夜一陣陰風吹開房門，吹熄咗盞燈，「祟」啱啱伸手去摸細路嘅頭，枕頭邊發出道道閃光，嚇到「祟」走鬼咗。第二日，兩公婆將用紅紙包八個銅錢嚇退「祟」嘅事講咗畀大家知，以後大家就跟住做，啲細路就太平無事。原來八個銅錢係八仙變嘅，暗中保護個細路。因為「祟」與「歲」諧音，之後逐漸演變成「壓歲錢」。到咗明清，「以彩繩穿錢編為龍形，謂之壓歲錢。尊長之賜小兒者，亦謂壓歲錢」。所以一啲地方將畀細路壓歲錢叫做「串錢」。到咗近代就演變為紅紙包住一百文銅錢賜畀晚輩，寓意「長命百歲」。對已成年嘅晚輩，紅紙包入面就會放一個銀元，寓意「一本萬利」。貨幣改為銀紙後，長輩都鍾意去銀行換票面冧巴相連嘅新銀紙畀細路，祝願細路「連連高升」。
- 源於古代「壓驚」。話說喺太古時有一種凶獸叫做「年」，隔365日後之夜，就要出來傷害人畜、莊稼。啲細路仔驚，大人則用燃竹響聲驅「年」，用食品安慰細路，稱佢做「壓驚」。年久日深，咪演變為以貨幣代食物，去到宋朝就有「壓驚錢」囉。據史載，王韶子南陔，因為俾壞人孭走，喺途中驚呼，先至俾皇車所救，宋神宗賜咗佢「壓驚金犀錢」。以後先發展為「壓歲錢」。
- 最早出現喺大唐宮廷，當時宮中有散錢之風。王仁裕響《開元天寶遺事》度講：唐玄宗天寶年，「內廷嬪妃，每於春時，各於禁中結伴三人至五人擲錢為戲。」王建響《宮詞》中載：「宿妝殘粉未明天，總立昭陽花樹邊。春日內人長打白，庫中先散與金錢。」從春日「擲錢為戲」，到「散與金錢」，後又發展到贈「洗兒錢」。據司馬光《資治通鑑》所講，楊貴妃認咗安祿山做義子嗰陣時，「玄宗親視之，喜贈貴妃洗兒錢」，以賀喜驅邪。去到大宋、大元，就形成一種民俗。佢同正月初一農曆新年結合，形成早期嘅「壓歲錢」。但當時重未有流通嘅貨幣，而只係一種特製嘅「壓歲錢」。