大埔太和路

大埔太和路（Tai Po Tai Wo Road）係香港一路，喺大埔，係爲大埔新市鎮而起嘅路，唔少路段都近林村河，貫通新市鎮東西，全條路都係雙程行車，而且路面都幾闊，政府定咗佢嘅一啲路段車速可以去到每個鐘七十千米。

大埔官立中學對出嘅一段大埔太和路

名

大埔太和路，故名思意，就係大埔嘅路，而太和可以指佢經過嘅太和邨，又可以指大埔新墟，即係太和市。

路線

大埔太和路貫通新市鎮東西，佢西起梅樹坑，駁住吐露港公路，之後近錦石新村過林村河入大埔頭一帶。過河後係寶雅苑，路轉東北，到大埔官立小學同太湖花園轉東南。之後途經太和邨，到大埔舊墟遊樂場轉東，又貼近林村河，經大埔官立中學、大埔中心、大埔警署，入完善公園，最後喺大埔海濱公園外，同完善路路口駁埋。經完善路，南駁返吐露港公路，北又去到汀角路。