大埔舊墟天后宮
大埔舊墟天后宮係香港一座天后廟，主祀海神天后，喺新界大埔舊墟汀角路，係包括大埔頭、南坑、新圍仔嘅「聯益鄉」嘅祭祀中心，係香港歷史最悠久嘅天后廟之一。每逢喺農曆三月廿三日天后誕前後，大埔舊墟天后宮都有大規模嘅演劇活動，過去每年都辦演劇賀誕活動，近年因為粵劇逐漸式微而改咗三年舉辦一次，表演同巡遊場地就喺對面嘅「風水廣場」。大埔墟天后宮喺1981年被列做二級歷史建築，但喺2010年1月22號改評為香港三級歷史建築。
歷史
編輯大埔舊墟天后宮喺清朝康熙三十年（1691年）起，當年原處係海旁，因為經年填海擴濶地方，而家已坐立喺大埔市中心。天后廟旁邊嘅偏殿分祀有「譚仙宮」同「協天宮」。而廟裏面仍保存立廟所鑄嘅銅鐘，同埋每次重修時所題刻嘅匾聯同碑記。
重光慶典
編輯2009年（己丑年）係大埔舊墟天后宮有紀錄證明嘅第六次重修，重光日碰啱天后寶誕吉日，天后宮舉辦一系列嘅重光慶典活動，內容包括：祈福息災法會、賀誕演劇、賀誕飄色巡遊、重修重光揭幕典禮同慶典頒獎禮等。重修重光揭幕慶典邀請咗行政會議成員劉皇發、立法會議員張學明同大埔區民政專員潘太平主禮。