劉皇發

劉皇發
出生日	1936年10月15號
出生地	屯門
死亡日	2017年7月23號（80歲）
死因	柏金遜症
國籍	中華人民共和國、英屬香港
信奉	佛教
職業	太平紳士、政治人
政黨	香港經濟民生聯盟、Economic Synergy、自由黨、Federation for the Stability of Hong Kong
仔女	劉業強
	[改維基數據]
	睇; 傾; 改;

劉皇發，GBM，GBS，OBE，MBE，JP（LAU Wong-fat，1936年 10月15號—2017年 7月23號），人稱發叔，新界鄉議局前主席、做過香港立法會議員、屯門區議會主席、前自由黨成員。劉皇發響香港新界屯門龍鼓灘村出世，係新界原居民。

佢係香港鄉事派元老，自1980年起出任新界鄉議局主席，領導新界原居民，所以有「新界土皇帝」或「新界王」稱號。

簡介

劉皇發生於屯門龍鼓灘村窮等家庭，係家中獨仔。佢響靈山中學初中畢業後，幫父母耕田，後來到九廣鐵路公司做路軌上漆工作，之後又響元朗開雜貨舖做小生意。

政途

1960年，劉皇發喺前任新界鄉議局主席陳日新嘅支持下，擔任屯門龍鼓灘村村代表，成為當時最年輕嘅新界鄉村代表。1972年，劉獲選為屯門鄉事委員會副主席。其後，劉皇發成功游說龍鼓灘村民，出售地皮畀政府做英軍操炮區，因為咁得到港英政府嘅賞識，成為日後投身政壇嘅踏腳石。1973年，劉獲港英政府委任為太平紳士。1980年，劉出任新界鄉議局主席。1982年，劉出任屯門區議會主席。1985年，劉出任區域市政局議員。同年，佢獲港英政府委任為立法局議員。1991年及1995年，佢循功能組別「鄉事」組別嘅途徑，自動當選立法局議員。1996年，劉擔任臨時立法會議員。1998年及2000年，劉都係循鄉議局功能界別自動當選立法會議員。2004年，劉改以區議會功能界別參選立法會，並順利當選。2005年7月1號，劉獲頒香港特別行政區政府最高榮譽嘅大紫荊勳章，以表揚佢對香港社會嘅貢獻，佢亦係首位新界原居民有呢個榮譽。

佢曾經係立法會最老嘅議員，又同林偉強、張學明、李國英合稱「立法會鄉事四子」。2016年，佢唔再冧莊立法會議員，交棒畀大仔劉業強。

2017年7月23號，劉皇發去世，享年80歲。

地方名

香港嘅街道、地方好少會以本地知名人士命名，但劉皇發就得到呢個榮譽。響1974年為配合將「青山區」改名做「屯門區」，港英政府將當時區內唯一嘅公共屋邨「青山邨」改叫「新發邨」，「新」係指前新界鄉議局主席、時任屯門鄉事委員會主席嘅陳日新；「發」就係指當時屯門鄉事委員會副主席劉皇發。而新發邨現已重建成今日嘅港鐵屯門站；而「皇珠路」嘅名就係將劉皇發嘅「皇」字同佢老婆吳妹姝嘅「珠（姝）」字合併而成。

另外，位於安定邨嘅仁愛堂劉皇發夫人小學，同埋大角嘴嘅世界龍岡學校劉皇發中學，都以佢個名命名。

名下馬匹

劉皇發同吳妹姝兩公婆係香港賽馬會會員，名下馬匹大部分都係以「龍船」兩字命名，包括金玉滿堂（同陳日新、何新權、梁紀曾合夥擁有，係1978-1979馬季進口嘅配售新馬，烙號AM237）、龍船（呢隻馬嘅中文馬名用過三次，但三駒英文馬名唔同，一匹係1984-1985馬季進口嘅自購馬（先後由歐金洪、告達理訓練過），烙號BA072，英文馬名叫REGAL ACE；一匹係1999-2000馬季進口嘅自購馬（練馬師係簡炳墀），烙號BV192，英文馬名叫FISHERMAN'S CREEK；一匹係2015-2016馬季進口嘅自購馬（先後由蔡約翰、丁冠豪、鄭俊偉訓練），烙號V186，英文馬名叫BIG BANG BONG）、金龍船、猛龍船、龍船義浩、大龍船、真龍船、龍船快（呢隻馬嘅中文馬名用過兩次，但兩駒英文馬名唔同，一匹係2010-2011馬季進口嘅自購新馬（練馬師係告東尼），烙號M144，英文馬名叫REAL DRAGON；一匹係2021-2022馬季進口嘅自購新馬（練馬師係呂健威），烙號G229，英文馬名叫FOREVER GLORIOUS）、驪龍、龍船鼓響。另外，劉皇發、劉吳妹珠兩公婆亦都係07/08告東尼練馬師賽馬團體、新界鄉議局團體嘅成員，名下馬匹有「金玉滿堂」（CJ286）、「新界福星」、「新界之星」、「新境界」。

除此之外，劉皇發個大仔劉業強、大女婿黃汝坤、二千金劉麗華、三千金劉玉蓮、三女婿余漢坤、外孫女黃雍賢、黃雍蔚亦係香港賽馬會嘅會員，名下馬匹包括強人、客家寶、知己知彼、知己百勝、好知己、驌龍、騂龍、翠龍、疾風勁草、龍船旺、龍船勁、龍船寶、勁風、哥哥仔、小阿哥、縱橫十六、艦長天下、龍鼓飛揚、專一、龍船狀元、專家、雙天寶馬。