大專學界反送中升級行動
大專學界反送中升級行動，又叫大專學界反逃犯條例修訂升級行動，係2019年6月21號由香港大專學界發起嘅示威行動。皆因當局一直無回應由民間同大專學界提出嘅「四大訴求」（撤回《逃犯條例》修訂、收返對6月12號抗議活動嘅「暴動」定性、撤銷有關所有控罪同埋追究警隊濫權），大專學界決定將示威行動升級，號召市民喺21號朝早7點開始包圍香港政府總部。當日朝早11點開始，示威者開始佔領政府總部對出嘅夏慤道，中午開始聚集香港警察總部門外堵塞所有出入口，下晝更一度去過稅務大樓、入境事務大樓同埋金鐘道政府合署圍堵，但挨晚之前絕大多數示威者已經重新集中返喺警察總部門外，一路去到深夜開始陸續自行散去。
