開主選單

反逃犯條例修訂運動

反逃犯條例修訂運動英文Anti-Extradition Law Amendment Bill Movement),簡稱反修例運動英文Anti-ELAB Movement),支持者又叫反送中運動,個別傳媒叫逆權運動[註 2],係香港2019年3月31號開始[註 1]一連串反對逃犯條例修訂草案嘅社會運動,形式包括和平嘅遊行同集會,亦出現激進嘅圍堵同衝擊行動。雖則香港政府自6月中已經停止咗修例工作,但要到9月初先至宣佈正式撤回修訂,加上未能滿足運動入面提出嘅其餘訴求,呢場運動到依家仍然持續落去。而呢次運動不但係香港自六七暴動以嚟最大規模嘅社會動盪,更加畀國際社會高度關注。

反逃犯條例修訂運動
逃犯條例修訂草案中港矛盾嘅一部分
6月9號著白衫遊行
6月16號著黑衫遊行
7月21號自發遊行
8月18號雨中擔遮自發遊行
日期 2019年3月31號到依家[1][2]
(到今日係第173日)[註 1]
地點 主要係香港,亦有世界各地幾十個城市
起因
目標 令香港政府接納以「徹底撤回《逃犯條例》修訂」為首嘅「五大訴求
特徵 遊行集會唔合作運動
衝突方
示威者

無統一組織,嚟自社會各界,後生仔比例高啲


主要支持組織

 香港政府

主要支持組織


 中華人民共和國政府

指揮人士
示威者

無統一領導

 香港政府

呢場運動源自2018年香港女子臺灣遇害案嘅疑兇喺現有制度下唔可以引渡返臺灣受審,香港政府就喺2019年2月提出逃犯條例修訂草案,畀香港將疑犯引渡到任何未同香港有引渡協議嘅地方,包括中國大陸。由於好多人都對中國大陸嘅司法制度無足夠信心,又擔心呢個安排會侵蝕香港「一國兩制」嘅根基,所以強烈反對修例。反對者又將「被引渡返中國大陸受審」嘅憂慮叫做「送中」,同「送終」諧音。民間人權陣線喺3月31號搞嘅遊行,係頭一個反修例嘅示威活動,之後社會各界亦以唔同方式表達反修例嘅訴求,但政府一路都企硬,聲稱修例係要「填補法律缺陷」,堅持安排喺立法會夏季休會前完成審議,結果引起更大規模嘅示威活動,6月9號民陣搞嘅反送中大遊行號稱有過百萬人參加,當局依然無動於衷,結果6月12號嘅示威演化成警民衝突,防暴警察被指使用過量武力,而政府曾一度話呢次衝突係「暴動」,引發更多民怨。行政長官林鄭月娥喺6月15號宣佈暫緩修訂草案,意圖令局勢降溫,但佢一路拒絕用「撤回」嘅字眼,大多數示威者都唔收貨,令運動規模逐漸擴大,「遍地開花」到香港各區,每個禮拜都有唔同區份搞示威活動,多數都出現激進示威者同警方對峙同嘅衝突情況。當局去到9月4號先至宣佈正式撤回修例,但仍然無回應其餘訴求,所以仍然未平息到民怨。

五大訴求

呢場運動當初爭取嘅係要求當局撤回《逃犯條例》修訂,隨住時局發展,支持者加入更多訴求,逐漸發展出獲運動參與者廣泛認可嘅「五大訴求」:

訴求內容 政府官方回應 狀態
1 徹底撤回《逃犯條例》修訂 行政長官林鄭月娥喺6月15號宣佈暫緩條例草案。佢再喺9月4號宣佈正式撤回條例草案 —— 保安局局長會喺立法會10月復會後,按《議事規則》提出撤回條例草案。  C 應承咗,有待落實[註 3]
2 收回對6月12號同其後抗議活動嘅「暴動」定性 政府話法律程序上唔存在「暴動定性」,又話每單案嘅刑事檢控決定,都係按證據、法律同《檢控守則》作出嘅。  N 唔接納
3 撤銷所有抗爭者嘅控罪 政府認為呢啲要求係法治社會所接受唔到嘅,又話根據《基本法》,律政司嘅刑事檢控決定必須唔受任何干涉,若果唔係就會違反咗香港嘅法治精神。  N 唔接納
4 成立「獨立調查委員會」[註 4],追究警隊濫權 政府認為警方執法行動應該按既定機制,交由專責嘅獨立監察警方處理投訴委員會(監警會)處理,而唔應該另設獨立調查委員會。監警會亦正按照佢嘅法定職權,詳細審視由6月9號開始發生嘅一連串大型公眾活動,目標係重組事實,評估警方嘅處理,同埋提出改善建議。  N 唔接納
5 全面落實雙「真普選[註 5] 政府認為社會需要喺法理嘅基礎上,同埋喺平和、互信嘅氛圍下,用務實嘅態度進行討論,若果唔係只會令社會更加撕裂。  N 唔接納

抗爭特色

呢場運動由民間自發,無大台指揮,參與者主要都係透過LIHKG(連登)討論區同通訊軟件Telegram交流。參與者可以分做兩類:多數都係參與和平合法示威活動嘅「和理非」(和平、理性、非暴力),亦有啲人係參與前線激進抗爭嘅「勇武」,雙方一般都同意下面嘅原則:

  • 唔流血,唔受傷,唔被捕」:告誡「勇武」要避免流血衝突,唔好受傷同唔好畀差人拉。
  • 唔分化,唔篤灰,唔割席」:告誡「和理非」就算唔認同「勇武」嘅激進手段,都要包容佢哋嘅行為,唔好內鬨。
  • 兄弟爬山,各自努力」:「和理非」同「勇武」可以用返各自嘅手段,去達致同一個目標。
  • Be Water」:出自武打巨星李小龍嘅名言,告誡「勇武」抗爭嗰陣要好似水噉樣識得靈活走位,唔好死守同一笪地方。

抗議活動

主要遊行

註: 遊行被警方發「反對通知書」

民間人權陣線主辦
其他遊行(包括被警方發「反對通知書」嘅自發遊行)

主要集會同和平活動

註: 活動無向警方申請「不反對通知書

主要包圍同衝擊行動

其他形式嘅抗議活動

常用抗議口號

每次示威活動,群眾都會嗌下面嘅口號,帶頭人先嗌上半句,其他人接埋下半句。

基本口號

口號 粵拼 背景同意義
五大訴求,缺一不可 ng5 daai6 sou3 kau4
kyut3 jat1 bat1 ho2
呢個口號講出咗呢場抗爭運動嘅主要目標,就係要求香港政府妥善回應「五大訴求」。另有英文版嘅口號:「Five demands, not one less.」。
光復香港,時代革命 gwong1 fuk6 hoeng1 gong2
si4 doi6 gaak3 ming6
呢個口號最初由香港本土派人士梁天琦喺參選2016年立法會補選嗰陣提出,希望各個世代嘅香港人可以參與革新,令香港變得更好。呢場抗爭運動入面,呢個口號再被廣泛採用。但係建制觀點認為呢個口號係變相鼓吹港獨
沒有暴徒,祇有暴政 mut6 jau5 bou6 tou4
zi2 jau5 bou6 zing3
呢個口號最初由運動期間佔領立法會嘅示威者提出,表達出示威者嘅激進行為完全都係因為香港政府嘅「暴政」激發出嚟。
香港人加油 hoeng1 gong2 jan4
gaa1 jau2
呢個口號係幫香港人打氣,意思比較溫和。
Fight For Freedom.
Stand With Hong Kong.
唔適用 呢個英文口號意思係「同香港一齊爭取自由」,主要對象係國際社會。
Free Hong Kong, Democracy Now 唔適用 呢個英文口號意思係「還我自由,渴望民主」。

針對警察嘅口號

通常喺有警察喺度嘅場合嗌。

口號 粵拼 背景同意義
香港警察,知法犯法[註 6] hoeng1 gong2 ging2 caat3
zi1 faat3 faan6 faat3
呢個口號係譴責香港警察濫用咗過份嘅暴力去對待示威者。元朗暴力事件後,呢個口號亦譴責埋香港警察涉嫌包庇黑社會勢力。
黑社會 hak1 se5 wui3 呢個口號針對香港警察喺7月21號晚同圍村手持棍棒鐵通嘅白衫「齊上齊落」,無拘捕執棍棒白衫,亦無處理白衫毆打示威者嘅案件。坊間認為呢件事係警黑勾結,將香港警察叫做黑社會。
黑警,還眼[註 7] hak1 ging2
waan4 ngaan5
呢個口號主要係針對8月11號示威活動嗰晚有位女義務救護員畀警方嘅布袋彈打傷右眼。
七二一,唔見人;
八三一,打死人
[註 8]
cat1 ji6 jat1
m4 gin3 jan4
baat3 saam1 jat1
daa2 sei2 jan4
呢個口號針對7月21號元朗暴力事件警察遲遲唔出現,而8月31號就有警察喺太子站毆打市民。
好仔唔當差,當差正仆街 hou2 zai2 m4 dong1 caa1
dong1 caa1 zing3 puk1 gaai1
呢個口號改編自傳統俗語「好仔唔當差」。

國際反應

8月底,第45屆七大工業國組織會議喺法國舉行。峰會發表聯合聲明,強調G7再次肯定給予香港一國兩制下自治嘅1984年中英聯合聲明嘅存在同重要性,敦促中國信守承諾維持香港自治。G7份聯合聲明仲呼籲避免暴力。

英國首相約翰遜表示,七國集團首腦對香港局勢深表關注,都支持一個穩定而繁榮嘅香港,並繼續致力於一國兩制框架。

8月27號,中國外交部發言人耿爽喺例行記者會話,中英聯合聲明終極目的係確定中國收回香港,任何國家組織無權假借中英聯合聲明干涉香港事務。七國集團首腦會議領導人發表聲明,對香港事務“說三道四、指手畫腳”,中方表示強烈不滿、堅決反對。[4]

相關創作

睇埋

  1. 1.0 1.1 亦有人用2019年6月9號民陣號稱有過百萬人參加嘅反送中大遊行做呢場運動嘅正式開始,到今日係第103日。
  2. 呢個稱呼由壹傳媒旗下媒體(主要係《蘋果日報》)帶頭用,理據係呢場運動已經超出咗反逃犯條例修訂,但暫時未算流行。
  3. 最快要等到立法會10月復會後先至落實到。
  4. 早期第四個訴求無提到要有「獨立調查委員會」,後嚟先至出現。
  5. 早期第五個訴求係「要求行政長官林鄭月娥落台」,後嚟運動參與者普遍認為改革政制先至治本,所以改由「真普選」取代。
  6. 後期開始有「香港警察,吞槍自殺」、「香港警察,強姦謀殺」等等嘅變體
  7. 喺8月11號傷眼事件發生前,比較常用嘅版本係「黑警,可恥」(hak1 ging2 ho2 ci2)。後期亦有其他變種,譬如「黑警,死全家」(hak1 ging2 sei2 cyun4 gaa1)。
  8. 8月31號太子站有無死過人有爭議,另一版本就將「打死人」轉做「打市民」(daa2 si5 man4)。

參考

  1. "香港反送中大事記:一張圖看香港人怒吼的185天" (用中文寫). 報導者. 2019年8月15日. 喺2019年8月24日搵到.  檢查日期值喺: |access-date=, |date= (詳情)
  2. "《我係香港人》2019 反送中,催淚彈下的一國兩制" (用中文寫). 沃草. 喺2019年8月24日搵到.  檢查日期值喺: |access-date= (詳情)
  3. "傘運感和理非無用 勇武者:掟磚非為泄憤". 明報. 18 August 2019. 喺1 September 2019搵到. 
  4. "中國外交部不滿七國集團要求北京信守中英聯合聲明". 美國之音. 喺2019-08-27搵到. 

出面網頁