維基百科

大慶油田

46°0′0″N 125°0′0″E / 46.00000°N 125.00000°E / 46.00000; 125.00000 大慶油田（粵拼：daai6 hing3 jau4 tin4）係位於中國東北黑龍江省嘅油田，總體喺大慶市。油田嘅名唔係源自當地地名，而係因爲佢喺中華人民共和國建國10週年之際發現，係中國第一處大油田、世界十大油田之一，由此改變自二戰之後中國石油依賴入口嘅局面，認爲係好值得慶賀嘅事，所以起名做「大慶」[1]。而大慶市名亦係從呢個油田來，喺之前當地地名叫「安達」。

大慶油田係中國最大嘅油田，係世界上無幾多嘅特大型砂岩油田，由薩爾圖、杏樹崗、喇嘛甸、朝陽溝等52個油氣田組成，含油面積6000幾平方公里，而勘探範圍包括黑龍江全省、內蒙古海拉爾、吉林延吉、琿春等15個盆地，登記探礦權面積16萬平方公里[1][2]。不過自2000年之後，大慶油田嘅原油生產衰退，於是逐漸轉爲產天然氣[3][4][5]。

史

編輯
内文：大慶石油會戰
  • 1959年，松基三井噴出工業油流，正式發現大慶油田[1][6]。
  • 1960年～1963年，油田發掘[1][6]。
  • 1963年，油田全面投產[6]。
  • 1997年，原油產量達最高記錄：5600萬噸[5]。
  • 1999年，中國石油天然氣股份有限公司（中石油）從國有企業中國石油天然氣集團公司分離，民營化噉經營大慶油田。
  • 2002年，因爲油田減產，有大批工人失業，亦削減工人福利，結果發生失業工人嘅大規模示威[7][8]。
  • 2003年，因爲原油減產、國內需求上升、中日爭端等，中國對日本嘅原油出口大降[9][10][11]。
  • 2005年～2007年，由於原來嘅產區生產衰退，去勘探新嘅產區（油田、天然氣田），結果探明有一億噸石油、一千億立方米天然氣，而着手開發[12]。

作爲時代符號嘅大慶油田

編輯

大慶油田喺1960年代開發，嗰時中國技術落後，靠係噉抌人力嘅人海戰術去開發。開發呢個油田時幾乎無用到外國技術、設備（至少無美國嘅援助），全靠班勞工，所以出咗啲勞動模範，亦都嗌咗個口號叫做「工業學大慶」。作爲現代工業奇蹟，亦鑑於大慶油田對中國工業嘅貢獻，喺舊陣時經常畀人提起，甚至聲名傳出國外，喺1970年代～1990年代時上過日本嘅地理敎科書[13]。而日本人對大慶油田嘅關注亦在於如果當年間畀佢哋發現咗先，二戰戰局可能好唔同[14][15]。不過隨住中國經濟猛速增長，石油需求劇增，越來越依賴外國石油[3]。1990年代之後，中國加入WTO，由此油田直接面臨國際油價競爭[8]，亦由於油田老化、產能下滑，佢急於提昇競爭力；而作爲大型國企，啲人認爲佢理所當然負責所有員工、甚至包埋佢嘅家庭世代，比如員工仔女一畢業唔理佢咩料都可以入呢間公司做嘢（包分配制度），人浮於事係國企通病。於是人力成本好不堪，甚至連豐厚利潤都蝕埋[3][16]。

結果，人事重組，大規模裁員，兼削減福利，作爲好大型嘅國企，佢裁得嘅員工非常之多[7]，於是引發工潮，發生大規模示威。當個油田開採到差唔多時，浄低嘅石油嘅開採難度會慢慢加大，同時油質下降，由此開採成本上升，同時由於市場，令大慶油田嘅利潤持續低走，後備資源唔夠，有都好投資成本都緊張，呢啲壓力直接轉嫁喺員工，加唔到人工，而中國物價飛漲，令員工生活質量下降[4]。此外一啲天然氣爆炸之類嘅油田事故[17]，亦都令員工問題成爲大慶油田好沉重嘅包袱。

產能下滑

編輯

大慶油田曾經係中國原油產量最大嘅油田[3]，不過到2000年前後，油田老化，採出物當中含水量高達九成，原油一成未到[3][18][5]。成個油田入到開發中後期，高含水、產量遞減避免唔到，所以原油產量下降，自1976年產量上到5000萬噸量級、穩產27年後，2003年下調到4000萬噸級至今[18][3][5]。2012年之後，大慶油田再都唔係中國產量最大嘅油田，而排喺長慶油田之後[18][3]。不過，雖然原油產量下滑，天然氣產量反而上升，所以而家油田逐漸轉產天然氣，叫做「以氣補油」[4]。比如2007年時，大慶油田原油產量4169.8萬噸[19]，天然氣產量25.5億立方米[20]，到2013年時，原油產量4000萬噸，天然氣產量33億立方米[18]。

雖然係噉，大慶油田嘅利潤持續走低，2005年稅前利潤破千億元，2011年跌成701億，2013年下滑到573億[3]。此外，由於環境政策，好似廢水處理呢啲環保成本都唔輕[21]。此外大慶油田要面臨國際競爭，比如2004年之後，世界油價高企，同時中國對外國石油依存度高，好多生意佬出國搵石油來賣[20]，同時中石油本身亦有海外開發項目[5]。大慶油田亦要面臨國內其他油田嘅競爭，中國搞緊西部大開發，諸如鄂爾多斯、準噶爾、塔里木、長慶、川渝、青海等都係有好豐富嘅油氣，油氣生產重點移向西部，來補返東部高含水量油田下滑嘅產量[5]。

工潮同示威

編輯

2002年3月，大批失業工人抗議保險金上漲政策、以及要求保障醫療、退休福利[7]，此外重指責政府腐敗、出賣國有資產而撢ngam4曬入自己荷包度，要求發返拖欠人工[8]，成立獨立工會，控制當局幹部嘅年終獎金[22]。示威持續約三個禮拜[22]，人數有話幾千人，亦有話四、五萬人[7]，係當地有史以來最大嘅工潮[7][22]。

2014年4月、9月，過千職工家屬、仔女示威，抗議大慶油田放棄「職工仔女畢業包分配」嘅制度[16][23]。包分配制度係大學生一畢業就有工開、唔使自己見工嘅制度，而家得少數好似大慶油田嘅企業單位重保留緊，企業內嘅職工佢哋嘅仔女就享受呢種待遇。噉樣嘅制度，入得大慶油田嘅人，佢嘅後代唔憂無米落鑊。所以導致大慶油田人力成本過高，機構腫滯，蝕咗利潤。有啲人認爲間企業根本唔使咁多人，裁噉啲係啱嘅，招工都應該搵嗰啲過到考核嘅人。而有啲人認爲，大慶喺黑龍江西部偏遠地方，唔入大慶油田呢個米飯班主，啲後生都唔知點搵食，而當年班工仔背井離鄉來大慶掘油田，對國家好大功勞，而家爲咗減員增效，而拋棄對員工嘅承諾，係面對社會道義嘅卸膊行爲[24]。

攷

編輯
  1. ↑ 1.0 1.1 1.2 1.3 陽欣 (2009年8月20號)。〈大慶石油會戰〉。中華人民共和國國史網。原著喺2015年4月27號歸檔。喺2014年10月21號搵到。
  2. ↑ 〈企業簡介〉。大慶油田。原著喺2014年10月4號歸檔。喺2014年10月22號搵到。
  3. ↑ 3.0 3.1 3.2 3.3 3.4 3.5 3.6 3.7 江旋 (2014年5月19號)。〈大慶油田陷中年尷尬：採出物90%都是水〉。《新浪財經》。第一財經日報。喺2014年10月21號搵到。
  4. ↑ 4.0 4.1 4.2 龐麗靜 (2014年9月25號)。〈中石油大慶油田持續減產，還能走多遠？〉。經濟觀察網。喺2014年10月22號搵到。
  5. ↑ 5.0 5.1 5.2 5.3 5.4 5.5 費偉偉、王彥田 (2003年1月14號)。〈經濟視點：大慶爲何要減產〉。人民網。原著喺2020年3月28號歸檔。喺2014年10月22號搵到。
  6. ↑ 6.0 6.1 6.2 〈發展歷程〉。大慶油田。原著喺2020年3月28號歸檔。喺2014年10月22號搵到。
  7. ↑ 7.0 7.1 7.2 7.3 7.4 〈大慶油田數千下崗工人示威〉。蘋果日報。2002年3月5號。原著喺2020年3月28號歸檔。喺2014年10月22號搵到。
  8. ↑ 8.0 8.1 8.2 〈大慶、遼陽工人繼續示威〉。BBC中文網。2002年3月20號。喺2014年10月22號搵到。
  9. ↑ 史寶華 (2004年1月12號)。〈中國對日原油出口面臨擱淺 雙方官員尚在談判〉。《京華時報》。搜狐財經。喺2014年10月22號搵到。
  10. ↑ 〈大慶油田今年原油產量將下降4.3%〉。《南方日報》。新浪財經。2004年1月7號。喺2014年10月22號搵到。
  11. ↑ 〈中國石油出口政策轉向 對日本和朝鮮影響最大〉。《第一財經日報》。新浪財經。2004年11月29號。喺2014年10月22號搵到。
  12. ↑ 〈大慶油田開創中國石油工業新局面〉。光明網。2007年9月24號。喺2014年10月22號搵到。{{cite web}}: CS1 maint: url-status (link)
  13. ↑ 〈大慶 （ダーチン） DAQING〉 (日文)。GTC ASIA CORPORATION。2009年11月9號。原著喺2016年3月4號歸檔。喺2014年10月23號搵到。
  14. ↑ aboo (2011年1月22號)。〈日本錯過大慶油田改寫二戰走向〉。《文匯網》。環球網。喺2014年10月21號搵到。{{cite web}}: CS1 maint: url-status (link)
  15. ↑ 梁波。〈日本人為什麼沒能找到大慶油田〉。原著喺2013年2月21號歸檔。喺2014年10月23號搵到。
  16. ↑ 16.0 16.1 〈大慶油田數千職工家屬示威 要求子女工作包分配〉。南華早報。2014年4月30號。原著喺2014年5月27號歸檔。喺2014年10月28號搵到。
  17. ↑ 解培華、倪子牮 (2014年2月28號)。〈大慶油田採油二廠食堂發生爆炸事故 目前兩人傷〉。《中國新聞網》。人民網。喺2014年10月28號搵到。
  18. ↑ 18.0 18.1 18.2 18.3 張艶 (2013年1月4號)。〈長慶油田產量奪魁 大慶油田變老二〉。《京華時報》。新華網。原著喺2016年3月4號歸檔。喺2014年10月26號搵到。
  19. ↑ 〈大慶油田未來十年可產4億噸油〉。中國評論新聞網。2008年3月23號。喺2014年10月26號搵到。
  20. ↑ 20.0 20.1 陳悅 (2008年1月4號)。〈油價破百·內地百名油商 中東另覓油源〉。文匯網。喺2014年10月26號搵到。
  21. ↑ 〈如何開啟潛在規模達百億的油田廢水處理市場？〉。《環球企業家》。安潔士。2013年12月8號。喺2014年10月26號搵到。{{cite web}}: CS1 maint: url-status (link)
  22. ↑ 22.0 22.1 22.2 〈中國民運—2002年3月份〉。香港市民支援愛國民主運動聯合會。2002年3月30號。喺2014年10月28號搵到。{{cite web}}: CS1 maint: url-status (link)
  23. ↑ 〈大慶油田數千職工子女連日示威遭毆打抓〉。博訊新聞網。2014年9月23號。喺2014年10月28號搵到。
  24. ↑ 忻霖 (2014年4月9號)。〈大慶油田不再包職工子女就業 數千職工抗議與千警衝突〉。自由亞洲電臺。喺2014年10月28號搵到。

連出去

編輯
由「https://zh-yue.wikipedia.org/w/index.php?title=大慶油田&oldid=1787516」收