黑龍江省

中華人民共和國 > 東北地區 > 黑龍江省

  想搵第二個意思嘅話，請睇黑龍江省 (搞清楚)。

黑龍江省 黑龙江省
簡稱：黑 地名出處：以黑龍江呢條河起名
哈爾濱聖索菲亞教堂
省城	哈爾濱
最大城市	哈爾濱
省委書記	許勤
人大常委會主任	許勤
省長	梁惠玲
政協主席	藍紹敏
面積 - 總面積 - 佔全國	第6位 454,800 km2 4.89%
人口（2020） - 總人口 - 人口密度	第20位 31,850,088 70人/km²（第28位）
- 民族	漢族-95% 滿族-3% 朝鮮族-1% 蒙古族-0.4% 回族-0.3%
- 本地語言	東北官話 膠遼官話 冀魯官話
GDP（2023） - 總值 - 佔全國 - 人均GDP - HDI（2022）	第25位 15,880億人民幣 2.65% 51,563元人民幣（第30位） 0.769（第18位） ── 高
政區類別	省
轄下 - 地級 - 縣級 - 鄉級	13個 128個 1284個
ISO 3166-2	CN-HL
時區	UTC+8（中國標準時間） UTC+9（本地時區）
網站	黑龍江省府

黑龍江（粵拼：hak1 lung4 gong1；普通話拼音： Hēilóngjiāng ），簡稱黑hak1，係中國東北地區嘅省，省名以中俄界河黑龍江來命名，呢條江嘅滿文名叫Sahaliyan ula，意思係「黑河」，省名同江名都係意譯自滿文。北面同東面係俄羅斯，南面接住吉林省，西面接住內蒙古。佢嘅省城係哈爾濱市。

全省由西北到東南都係連續嘅山地，包括大興安嶺、小興安嶺、完達山、張廣才嶺等山脈，其中好多係火山。而西南部嘅松嫩平原係主要嘅農業區同人口聚居區域。黑龍江、烏蘇里江同埋松花江交滙嘅地區就係三江平原，入面有大片沼澤濕地，係著名嘅「北大荒」，中國派咗建設兵團去開墾呢啲地方。中國邊疆最東點（黑瞎子島）同埋最北點（漠河）都響黑龍江省。

黑龍江省係中國鐵路通車里程最長嘅省，幾乎所有重要城市都有火車接駁；公路、內河航運都好發達；省入面有兩個國際機場，分別係哈爾濱太平國際機場同牡丹江海浪機場，機場航線可以飛去全國重要城市，同埋少數境外城市。

史

上古

喺黑龍江嘅雙鴨山地區，考古發現七千年前嘅人類遺蹟。最初時，今日嘅中國東北地區有三大民族：肅慎、濊貊、東胡。當中原入到商周時期，而家黑龍江嘅居民係啲肅慎部落，佢哋靠遊獵爲生，據史料佢哋曾經向周成王進貢弓同箭。

濊貊係濊人同貊人嘅合稱，佢哋唔係遊牧民族，而靠農業生存。夏商時，濊人住喺山東半島，係東夷民族。周滅商後，濊人畀周朝逼到大部份遷徙去東北，以松嫩平原爲中心定居，不過佢哋活動範圍好大，最南去到長城以北，挨近燕國，而喺遼河以東接續到肅慎人。西周時，濊人朝貢過周王室。春秋時，齊桓公對濊人發動過戰爭。戰國時，濊人開始從事農業同漁業，黍米成爲濊人嘅主糧。呢時濊人已經入到原始社會末期，過住定居生活。貊人係蒙古草原嘅遊牧民族，佢哋講阿爾泰語系嘅話。

氣候

黑龍江屬中溫帶同寒溫帶之間嘅溫帶季候風氣候，年均溫度-4℃到5℃，從東南部出發，越往西北越凍，東南部同西北部嘅年均溫差近10℃。一月氣溫係-32℃到-17℃，七月氣溫係16℃到23℃。一年當中好天較多，有90日到120日係無霜期。年均降雨量400到700毫米。春天嗰時松嫩平原同三江平原有豐富嘅風能。