大漢山國家公園
大漢山國家公園（馬來話：Taman Negara）係馬來西亞半島上面一個國家公園，喺1938年至1939年成立，當時叫做佐治五世國家公園。馬來西亞獨立之後，改名做「國家公園」，因大漢山座落喺呢度，所以別名大漢山國家公園。呢個公園佔地4,343平方公里，擁有世界上最古老嘅熱帶雨林[1][2]。
| 大漢山國家公園 | |
|---|---|
 淡美嶺河（Sungai Tembeling）冠層天橋上嘅景觀 | |
| 位置 | 馬來西亞 |
| 最近城市 | 淡美嶺 |
| 面積 | 4,343 km² |
| 建立時間 | 1938/1939 |
| 主管團體 | 野生生物及國家公園局 |
大漢山國家公園坐落喺彭亨、吉蘭丹同登嘉樓三個州屬交界處，分屬三州管轄，各地分別遵循所屬州嘅法律，其中彭亨所佔部份最大，一共2,477平方公里；吉蘭丹部份佔1,043平方公里；登嘉樓部份佔853平方公里。
公園地處大漢山脈之中，呢個地方熱帶雨林已經有一億三千萬年歷史[3]，大約喺白堊紀時已經形成，比剛果同亞馬遜熱帶雨林仲要古老，所以呢度嘅生物多樣性相當豐富。
大漢山國家公園嘅生態景觀已經成為馬來西亞出名嘅旅遊項目。公園入面好多地方都係地質學同生物學景點。大漢山係西馬最高峰，公園入面仲存在好多珍貴稀有品種動物，例如馬來亞虎、食蟹猴、蘇門答臘犀牛、大眼斑雉、紅原雞、印度野牛同亞洲象等。特別係極其稀少嘅鳳冠孔雀雉呢度都有。大漢河（Sungai Tahan）亦係瀕危物種吉羅魚（Tor tambroides）嘅保護地。
瓜拉大漢（公園彭亨區總部所在地）附近仲有其他景點，包括冠層天橋、耳洞（Gua Telinga）、Lata Berkoh瀑布等。
所有去大漢山國家公園嘅遊客都必須得到野生生物及國家公園局嘅許可。
