大潭𡰪

大潭𡰪（Tai Tam Tuk；Tytam Tuk；Tytam Took；𡰪讀督），又寫大潭叾（叾讀督）係香港一地，係香港島大潭洋面之中，最𡰪𡰪嘅地方，所以叫大潭𡰪。因爲𡰪同叾唔係文言常見字，又借字寫大潭篤。家下有大潭篤水塘同大潭篤村。大潭童軍中心亦在此。

地理

大潭，故名思意，係個大嘅潭。潭三面環海，畀赤柱半島同石澳半島夾實。英人將個潭分成兩名，白筆山到黃蔴角，叫大潭灣，水面較闊，而白筆山到大潭𡰪，叫大潭港，水面較窄。

史

大潭𡰪就正正喺大潭港最入嘅地方。英人未建大潭篤水塘之前，大潭𡰪係谷地涌口，前面有淺灘。涌口有客家村，叫大潭𡰪，多數姓鍾，亦有幾戶姓邱、陳。佢哋祖先約莫十七世紀，由廣東梅縣同五華遷來，以耕種維生。而對出淺灘係水上人聚集之洋面，以避風浪。大潭𡰪，就係由條村留落來。

香港政府鑑於薄扶林水塘唔够使，就起多個水塘。政府相中大潭𡰪一帶山谷，分期而建。一八八二年，起好第一個。之後亦有幾個落成。到咗一九一二年，最後一期，起到大潭𡰪村。當時村中住有七十六人，村民全部得到政府賠償，徙去柴灣。工程於一九一七年完工。一九一八年二月二號，當時港督梅含理揭幕。

今日壩外亦有大潭篤村，同原本客家村無關，村民係水上人搬上岸嘅住。

而因爲柴灣發展城市，香港童軍總會喺柴灣嘅營地，亦搬到大潭𡰪，名大潭童軍中心。

交通

大潭𡰪地處偏僻。之不過由於係石澳同淺水灣之間必經之路，所以壩頂貫通大潭道。由於佢係十九世紀嘅設計，加上偏僻，所以車道只有一綫，車以停係壩前，確保無對頭車，先可以通行。