大躍進
大躍進（粵拼：daai6 joek6 zeon3）係中華人民共和國喺1958年開始、直到1961年初呢幾年間發生嘅社會運動，呢個社會同經濟計劃期望可以喺共產革命過嘅中國快速打造出一個社會主義嘅現代社會，即透過使用中國龐大嘅人口、令工業同農業發展出現好大嘅進步，最屘令到中國大陸從農民社會做基礎嘅農業經濟體、轉變成基於現代工業嘅共產社會。
呢項工農業大增產政策係由毛澤東所主導嘅。喺1957年反右運動中，毛澤東得到咗黨內主導權，之後佢根據生產力理論施行大躍進政策，先係用權力鬥爭打擊反對派，然後用合作社、人民公社、大食堂呢啲形式將國民財產全部攞走、共有化，透過推進呢啲共產主義政策，毛澤東宣稱話能夠喺數年間掌握核武裝，並且經濟上喺15年以內追上甚至超越美國同英國。
但係，啲政策不切實際，啲手法亦無視現實，導致唨好多危機。尤其係唔顧農村嘅實際，生硬噉推行集體農場、糧食徵購、軍事化管理，啲人喺政策推行過程中唔係處刑死就係捱拷問至死；而且喺農村中用土窯煉鋼，結果衹得廢鋼，並冇實際嘅經濟、生產效益，導致產業、設施、環境嘅大破壞。生產難以進行，生活難以繼續，唯有靠浮誇、造假、欺瞞嚟營造躍進假象。最終邇場運動喺中國國內招來咗大混亂，導致人類史上波及最多人嘅大饑饉，係20世紀最惡劣嘅大饑荒之一，餓死嘅人超過兩千萬[1][2]，有可能仲多過四千萬[3][4]，正係毛澤東努力嘅結果。
場運動以大失敗結束後，1962年初嘅中央工作會議七千人大會召開，會上中共研究咗大躍進嘅頹敝後果。雖然大會之前毛澤東就已經受唨指責，但佢喺會上先至做官方檢討。因爲噉，一啲溫和嘅高級黨員、如劉少奇同埋鄧小平，得到咗更多嘅權力，而毛澤東嘅權威冧臺，逐漸冇聲出。出於恢復、鞏固權力嘅目的，毛澤東喺1966年發動咗文化大革命。
大躍進政策係世界上出過最多犧牲者嘅社會主義政策。今時大多數人、無論中國內外，都睇佢係一場經濟大慘禍。
概述
編輯
1957年11月6號，蘇聯共產黨第一書記赫魯雪夫發表宣言話「蘇聯嘅工業生產（鋼鐵同石油、水泥）同埋農業生產可以喺15年以內超越美國。」
攷
編輯- ↑ 林蘊暉 (2008年)。《《國史札記》》。東方出版中心。頁 279～282。ISBN 9787801868923。
- ↑ 楊繼繩 (2008年)。《《墓碑》》。香港天地圖書公司。ISBN 988-98927-5-8。
- ↑ 〈「大躍進」引起的人口變動〉。2007年6月16號。原著喺2007年6月16號歸檔。喺2020年1月16號搵到。互聯網檔案館嘅歸檔，歸檔日期2007年6月16號，.
- ↑ 〈學者：大躍進死了4500萬人〉。《中央社臺北2010年9月17號電》。
{{cite web}}: CS1 maint: url-status (link)