,又叫做媒人,為兩家說親嘅人,撮合婚姻。如說文寫,「媒。謀也,謀合二姓。」又鄭玄箋,「媒者,能通二姓之言,定人室家之道。」古時若要兩家結親,就要有媒,幫兩家做中間人,定好親事。如此亦衍生出媒介之意。

維基辭典有佢嘅解釋:
想搵第二個意思嘅話,請睇媒 (搞清楚)

舊時女人做媒,叫做媒婆媒人婆,而媒人嘅工作就稱為做媒。古有三姑六婆,媒婆都係其中之一。媒亦有冰人之名,出自晉書索紞傳令狐夢見冰下之人作媒。古時認為冰未解之際,陰陽交替之時,咁就啱婚姻。

遠古唔使媒,知母不知父,條村要多人力,到時到候自然野合。後尾世間事,越來越複雜,要有禮法。男女分隔,就有明媒正娶依回事,必須要有媒,為兩家說親,咁先合禮數。若然成婚,媒人可以收到報酬,叫做媒人利市。若然有無可奈何之因,仍有天地為媒,拜神為媒嘅做法。

要有媒之原因,出於結婚為兩家大事,並非純粹男女情投意合。後生男女,入世未深,未必要諗到咁遠。男女婚後唔夾,搞到兩家不和,又或者兩家唔夾,搞到夫妻都唔好過。做媒責任重大,要清楚兩家,俗語謂「查家宅」,就係咁道理。

如此亦非單單華夏而言,就如舊時西方猶太人,篤信宗教,男女唔會無故見面,見面就為結婚。若有家有意,就搵人做媒,查好晒男女同家底。媒人甚至有專職,要收錢嘅。

自由拍拖興起之後,媒人唔再係婚姻嘅必備一環,離婚亦唔難。不過依然有人未能得偶,怕醜又好,事業太忙又好,周圍無啱嘅人又好,如此種種,就有生意婚姻介紹所速配相睇,以求撮合單身人士,都可謂叫媒。

方法 編輯

一般而言,媒本身並非職業,能為兩家謀合,只要熟悉兩家就可以,講通就可以。

古時西方各鄉各村,教堂為眾家之媒,無論天主教,定猶太教,身負神職,熟悉地方各人,可以撮合婚姻。或者會安排一啲聚會做機緣,以助撮合。

撮合至棹忌拉錯紅綫,雙方唔夾。如此,想婚姻美滿,古時會問於神明,問於天,尤其古時男女少見面,夾唔夾就要睇命理。唐人來講,多以時辰八字。西洋如猶太印度亦會用占星術。咁就要靠熟悉依門嘅人。

現今睇夾唔夾,西方有利用新技術如遺傳基因,又或者性學,咁亦要有顧問專家。

生意 編輯

今下媒人,為一門大生意。由婚姻介紹所,到配對網站都有。

神祇 編輯

唐人亦有唔少神祇,同媒有關,人拜神謀求撮合。如女媧,為婚姻神祇。如月下老人,傳說會拉紅綫,暗中定下姻緣。

顧忌 編輯

撮合婚姻唔係易事,若然婚姻不合,誤人一生,於心有愧,招來怨恨。所以有謂,「唔做中,唔做保,唔做媒人三代好。」中間人擔保人、媒人,責任大,會惹上麻煩,都係難做。