孔乙己

《 孔乙己（粵拼：hung2 jyut3 gei2） 》係魯迅小說集《吶喊》入面嘅一篇小說，亦係嗰篇小說嘅主角。呢篇小說係魯迅喺五四運動前繼《狂人日記》之後寫嘅第二篇白話小說。呢篇小說描寫孔乙己作為一個考唔到秀才嘅讀書人，缺乏實際技能，淨係識得「茴香豆嘅『茴』字有幾種寫法」咁樣拋書包嘅知識。佢失去咗做人嘅尊嚴，淪落做小酒館「鹹亨酒店」俾啲人取笑嘅對象，後來因為偷書而俾人打斷咗對腳。根據小說嘅內容，因為佢姓孔，啲人就喺描紅紙上嘅「上大人孔乙己」呢種半懂不懂嘅嘢度，幫佢改咗呢個花名，叫做「孔乙己」。

小說暴露咗當時嘅一啲社會問題──科舉制度製造咗大量淨係識死咪書，冇實際維生技能嘅讀書人。小說塑造咗孔乙己咁樣一個又好笑又悲慘嘅低下階層人物形象，揭露咗人同人之間嘅冷漠無情。

人物

• 孔乙己：一個考唔到秀才嘅讀書人，喪失咗做人嘅尊嚴，淪落做小酒店嗰度俾人取笑嘅對象，最後下場不明。
• 掌櫃：孔乙己成日去飲酒嘅「咸亨酒館」嘅老闆。
• 丁舉人：因為孔乙己偷咗佢嘅書，將孔乙己吊起來打斷對腳。
• 「我」：講小說嘅人，人物身份係咸亨酒店嘅企堂。