花名

花名（粵拼：faa1 meng2，Nickname）係人嘅一種唔正式嘅名，又嗌綽號、暱稱。通常係比較熟嘅人先會互相嗌對方嘅花名，所以喺某啲場合，有啲人習慣唔用真名，而係用花名嚟代替，以表示同對方關係好好。有理論指｢花名｣源自｢花名冊｣（戶籍冊俗稱，紅樓夢用過），而｢花｣指繁雜。古時少人識讀冊上名而睇到眼花。

由花名產生、獲得（對本人嚟講）又嗌朵，係外號噉解，意思係其他人幫自己改嘅名。而改花名呢個行為又叫起朵。

一個人嘅花名可能嚟自：

• 本身個名嘅簡化或者某種變形，例如係食字或者形狀類似嘅第啲字
• 身體嘅某個顯著特徵（例如：瘸佬陳，當中「瘸」字就代表嗰個人身體嘅特徵）
• 對象曾經做過嘅某件事（例如：瀨尿明就代表嗰個人試過瀨尿）
• 對象嘅性格、氣質或者生活習慣（例如：白粉強，就代表嗰個人成日食白粉）

舊時妓女用嘅化名又叫花名，但似乎同綽號或花名冊冇乜關係。