孫夫人

孫權嘅妹,劉備嘅老婆

孫夫人粵拼syun1 fu1 jan4),後人多數叫佢做孫尚香粵拼syun1 soeng6 hoeng1)或者孫仁syun1 jan4),係三國時期孫吳皇帝孫堅個女、孫策孫權個細妹,建安十四年(209年)十二月做咗劉備老婆。

孫夫人

生平

佢係孫堅個女,響吳郡富春縣(即依家浙江省杭州市)出世。史書話佢自細性格剛烈,才思敏捷,似足幾個大佬。

赤壁之戰過後,孫權意識到劉備份人唔簡單、想拉攏佢,所以就將細妹孫夫人嫁畀劉備。劉就去到京口同孫權見面,傾咗關於荊州嘅事,作為聯婚嘅回應。

但係孫夫人生性剛烈,成日拎住把劍防身,隨身嘅百幾位婢女全部帶住武器;再加上佢恃住自己係孫權個妹,手下嘅士兵好多都「冇王管」。咁樣唔單止令到劉備響入內房嗰陣成日好鬼驚青;根據諸葛亮嘅講法,劉仲將孫夫人視作同曹操一樣嘅禍患。據傳後嚟劉備同孫夫人分開住。

212年(建安十七年),劉備入主蜀,響東吳大臣法正嘅勸告之下將孫夫人送返東吳。孫權派咗大船嚟迎接佢,其中佢想帶走埋劉禪,但係畀諸葛亮派嚟嘅趙雲張飛截住。之後《三國志》再冇提及過孫夫人去咗邊。

據《資治通鑑補》嘅講法,孫權後嚟同劉備講和,將細妹送返蜀國,點知途中劉備死咗,孫夫人因而自殺。

史書並未提及過孫夫人嘅真名,就連野史都冇講過。

三國演義》話「孫仁」係孫堅個女,而睇返後文所登場嘅女人、推斷呢個女人就係孫夫人。但係根據裴松之響幫《三國志》作嘅注釋,就話「孫仁」係孫朗(孫堅庶仔,孫夫人阿哥)嘅第二個名。

而依家最為人所知嘅名「孫尚香」,本身係京劇用多,例子有《甘露寺》、《別宮祭江》、《回荊州》等。