尊經

《尊經》係唐朝波斯教士景淨從530部景教經書繙譯過來嘅寫本之一。1908年，法國探險家伯希和喺敦煌發現咗該寫本，而家藏喺巴黎法國國家圖書館。

《尊經》原始寫本

概述

《尊經》同《景教三威蒙度讚》係寫喺同一卷寫本入面，全文一頁，分四部份。第一部份宣明聖父、聖子、聖靈三位一體：「敬禮妙身皇父阿羅訶，應身皇子彌施訶，證身盧訶寧俱沙，已上三身同歸一體」。

第二部份列擧咗瑜罕難、盧伽、摩矩辭、明泰、牟世、多惠、寶路、千眼、珉艷、岑穩僧、報信等諸多法王。第三部份列出已經繙譯成漢文嘅《敬禮常明皇樂經》、《宣元至本經》、《志玄安樂經》、《多惠聖王經》、《阿思瞿利容經》、《渾元經》、《傳化經》、《原靈經》、《三際經》、《師利海經》、《寶路法王經》、《刪河律經》、《三威讚經》、《牟世法王經》、《彌施訶自在天地經》、《四門經》、《啓眞經》等35部景教經書。

第四部份敍述唐太宗貞觀九年西域大德僧阿羅本奏上貝葉梵音（景教）經書530部，景淨繙譯咗其中35部，其餘猶未漢譯。

出面網頁

• 法國國家圖書館官網上面嘅《尊經》原始寫本一覽 （法文）