少數族裔 (加拿大)

少數族裔（英文：visible minority；法文：minorité visible），喺加拿大，係指唔係高加索人或者膚色唔係白色，但係又唔係原住民嘅其他族裔。Visible minority 係勞工法入面嘅正式叫法，但係已經唔興；喺民間開始用形容詞 racialized 一段日子之後，官方喺2021年開始，喺可行嘅情況之下，亦改咗用 racialized（法文：racisé）。

根據2021年嘅人口普查，全加拿大大約有964萬人係少數族裔，佔全加拿大總人口大約 26%。據官方估計，到咗2040年，少數族裔人數將會介乎4505萬至5123萬之間。

名

新叫法 racialized 指被動咁 ｢被族裔化｣，即係所屬族裔被人 ｢吹大｣。新叫法強調無論遭到乜嘢特別待遇，都唔係少數族裔本身嘅錯；而官方嘅定義就特別指可能會因為個樣joeng2、或者膚色、語言、文化等等嘅可見特徵而受到岐視。

民間嘅某啲社羣（例如工會），因為受到美國影響，好多時會唔講 racialized 而係講 BIPOC（英文讀音：/baiˈpɔk/，又叫 IBPOC），指 ｢黑人、原住民同有色人種｣。因為計埋原住民，呢個標籤同官方定義嘅少數族裔其實唔同意思；個標籤其實亦都冇得到少數族裔嘅普遍認受，甚至有啲少數族裔人士認為呢個標籤根本唔尊重三個社羣嘅生活經歷根本唔同。