嶺南學派

嶺南學派，又叫做江門學派，係明代理學嘅新學派，喺明朝中晚期形成，佢嘅始創者係嶺南最負盛名嘅理學家同詩人陳獻章。呢個學派以自然為宗，提倡「學貴自得」同「學貴知疑」，講究「獨立思考」，反對「人云亦云」。陳獻章話：「學貴知疑，小疑則小進，大疑則大進，疑者覺悟之機也」。呢啲主張，代表住一種革新精神，而家仍然閃爍住一代心學宗師嘅智慧光芒。

而家陳獻章嘅思想著作收錄咗喺《陳獻章集》入面。

學派創始人

陳獻章（1428年－1500年），字公甫，號石齋，廣東廣州府新會會城都會鄉人，後移居江門白沙鄉，人稱「白沙先生」。明代著名嘅思想家。佢話「自得者，不累於外物，不累於耳目，不累於造次顛沛。鳶飛魚躍，其機在我」，悟出「學貴自得」嘅至聖之功同「學貴知疑」嘅研究途徑，卒之打破咗自程朱以後「聖賢久寂寞，六籍無光輝」嘅現狀，創立咗中國明代嘅新學派——嶺南學派。

代表人物

• 賀欽（1437年－1510年），字克恭，別號醫閭，喺遼東義州衛出世。陳獻章嘅弟子。
• 林光（1439年－1519年），字緝熙，號南川，喺東莞茶山鎮林屋出世。陳獻章嘅弟子。
• 李承箕（1452年－1505年），字世卿，號大崖居士。陳獻章嘅弟子。
• 梁儲（1453年－1527年），字叔厚，又字藏用，號厚齋，喺廣東順德石墾出世。明朝內閣首輔。
• 林廷瓛（1454年－？），字公器，號南峰，明代吳川縣吳陽鎮霞街村人。明代進士。陳獻章嘅弟子。
• 張詡（1455年－1514年），字廷實，號東所，南海（而家廣東省南海縣）人，明朝學者。陳獻章嘅弟子，係追隨白沙先生最耐嘅學生。
• 湛若水（1466年－1560年），字符明，號甘泉，時稱「甘泉先生」，喺增城（而家廣東增城市新塘鎮）出世。係陳獻章之後，嶺南學派嘅主要領導人。

參攷

• 王世理《試論嶺南學派的形成特點和作用》,嶺南文史第4期,1995

睇埋

• 嶺南文化

出面網頁

• 論江門學派
• 明代心學宗師——陳獻章
• 哲学开创江门学派 “岭南一人”陈白沙