嶺南盆景

嶺南盆景（Ling⁵ naam⁴ pun⁴ ging²），又嗌做粵派盆景（Jyut⁶ paai³ pun⁴ ging²）（「盆」又有人寫「盤」）係嶺南獨有嘅盆景藝術風格。呢個風格雖然話去到成 1930 年代先有人正式咁承認佢嘅存在，但係佢其實有成千年歷史，有得追溯去到 11 世紀。嗰時嘅中原皇帝宋哲宗將好出名嘅文人蘇東坡眨咗去廣東呢笪「南蠻之地」。雖然係畀人貶咗，但係據講蘇東坡一到步就即刻大讚嶺南山水植物靚（「嶺南萬戶皆春色」），而佢本人係盆栽發燒友，寫咗好多講盆栽嘅詩。睇返紀錄，粵人喺至少 15 世紀（大明時期）開始民間已經有唔少人鍾意整盆栽藝術。而到咗今日，嶺南盆景已經有咗自己獨有嘅一套風格。

廣東佛山花市有喺度賣盆景。

就算到咗廿一世紀，嶺南盆景藝術喺廣州同香港呢啲嶺南嘅大城市都有唔少人支持，重有好似香港嶺南盆景藝術學會呢類組織喺度搞。

美學

根據嶺南盆景藝術家嘅描述，嶺南盆景創作嘅美學（粵拼：Mei⁵ hok⁶）概念崇尚自然，唔鍾意畀啲形式嘢規限住，以自然界入面優美嘅景物做素材，目的係想做到以細見大，雖於喺個細細個盆砵入面，但係可以令人聯想到大自然嘅雄偉，所以畀人話有「來自於自然，又超越於自然」嘅特質。佢又會講求人工同自然嘅配合，例如係嶺南盆景藝術家好多時會好揼心機落去幫樖植物（自然嗰部份）揀返個同佢夾得埋嘅盆（人工嗰部份）。除咗咁，嶺南盆景藝術家唔單止在意外在嘅「形似美」，而且每個造型度都有獨特嘅神韻同意境，佢哋想欣賞者喺欣賞作品嗰陣會更加心領神會作者所表達嘅精神同情感內涵。

技法

嶺南盆景整嗰時慣常會用「截幹蓄枝」呢種技法：「截幹」係指緊將樹幹矮化，令到個形變緊湊啲；「蓄枝」係要令每段枝條成節，節上又有枝，造成「節密枝多，枝繁葉茂」嘅效果。 佢哋枝托嘅佈局要曉分疏密、分層次、上細下大、上短下長、內粗外幼、有主有次，並有唔留痕跡同埋睇重自然美嘅特色。

睇埋

• 盆栽
• 嶺南文化
• 嶺南園林

出面網頁

• 香港嶺南盆景藝術學會