嶺南園林
嶺南園林（粵拼：Ling5 naam4 jyun4 lam4），有時會嗌做粵式園林（粵拼：Jyut6 sik1 jyun4 lam4），係嶺南地區－即係廣東同廣西嗰頭－獨具一格嘅園林設計[1]。佢同江南園林同四川園林等畀人列做唐人園林嘅主要風格之一[2]。
嶺南係五嶺之南，位於歐亞大陸東南嗰個角落頭。佢緯度低，北有五嶺做屏障，南面有個南海，多山少平地，河網縱橫，受住強烈陽光嘅照射同埋海陸季風嘅影響，山清水秀，植物繁茂，一年四季都好多花草－係一個典型嘅亞熱帶（Subtropical）同熱帶（Tropical）自然景觀。自古以嚟，粵人同佢哋嘅祖先－南越人同打後嘅古漢人－喺呢頭創作咗豐富多彩嘅古園林，喺現代唐人之間堪稱一絕[3][4]。
點分類
編輯嶺南園林有分皇家、私家、公共園林呢啲唔同種。要皇家園林有南越王嘅四台同埋南漢（10 世紀）嘅西御苑等等。南漢個開國皇帝劉巖起嗰座九曜園重保存咗喺廣州。佢入面嗰舊九石係劉王命啲犯由江南嘅太湖、靈璧同三江買返嚟嘅。佢係現存嘅五代園林之中其中一個保存得最好嘅，而五代風格亦都為後尾出現嘅古典嶺南園林定立咗個基礎[5]。私有園林出名啲嘅有廣東嘅粵中四大名園同埋廣西嘅雁園。呢柞古典嶺南園林當中保存得最好嘅係廣州番禺嘅餘蔭山房－佢建築上面嘅灰塑門楣、英石堆山、規則池岸、木雕洞罩、廊橋組合都係古典嶺南園林嘅典範。
| 九曜園 | ||||||
|---|---|---|---|---|---|---|
|
| 私有古典嶺南園林 | ||||||
|---|---|---|---|---|---|---|
|
佈局類型
編輯嶺南園林有庭院式、自然山水式、綜合式呢啲佈局方式。庭院式係嶺南園林的特色，佢嘅小巧有得同日本嘅古典園林媲美，幾乎所有嘅屋企、酒家、茶樓、同賓館建築用嘅都係庭院園林，好似係東莞嘅可園、廣州嘅白天鵝賓館、同海口華僑賓館等。
地域類型
編輯嶺南園林有分廣東園林同廣西園林。廣東園林係嶺南園林嘅主流。呢種風格係以山水嘅英石堆山同崖潭格局、建築嘅緩頂寬簷同碉樓冷巷、裝飾嘅三雕三塑、色水嘅藍綠黃對比、廊橋、同四季繁花嘅植物做特徵；而廣西園林就以自然山水同歷史文化嘅積澱做主調，表現喺佢哋啲石林、石峰、石崖、石潭、壁刻嗰度。
自然要素
編輯山
編輯嶺南園林嘅園山有幾種：一係崖瀑潭局入面嘅懸崖，好似係清暉園嘅九獅山同鳳來峰；二係鼓石潭局嘅鼓石島，例如係萬石植物園嘅萬石湖度嘅真鼓石同南湖公園入面嘅塑鼓石；三係海礁局嘅礁島，好似係佛山梁園入面嘅龜石同湖心石；四係一般嘅堆山，好似係海口五公祠裏面嘅珊瑚石山。嶺南園林好少可用土堆山，就算係現代公園都係咁。
水
編輯嶺南園林屬水性，理水有好多種格局：一係崖瀑潭局嘅石潭同瀑布，好似係白天鵝賓館嘅故鄉水同水潭，或者係廣州山莊賓館嘅三疊泉；二係湖景，好似係惠州、潮州、同雷州嘅西湖，肇慶星湖同廣州流花湖等；三係潭－同崖瀑潭局唔同嘅係冇瀑布，水面會闊啲，例如柳州龍潭公園嘅龍潭同雷潭；四係流觴嘅曲水，好似係廣州雕塑公園入面嘅雲溪；五係井泉，如廣州嘅廉泉同貪泉－柳州魚峰公園三姐樓院嘅井欄就係咁；六係一船水池。
石
編輯嶺南園林喺石材同理石方面同江南或者北方園林唔同。佢石材有廣西湖石、廣東黃臘石同英石等。嶺南嘅理石唔鍾意向上堆疊，而多數係水平咁展開，有分置石法、堆石法、掛壁法、同塑石法呢啲手法。置石法係指用黃臘石、湖石同花崗石，分平置、拋石同埋石三種方法。石身會喺土上面，好似隨意拋置而成咁，例如係金茶花公園就用咗呢種手法；石根入土半截以下，稱為「平置」，例如湖里公園；石根超過一半入土稱為埋石，例如南山寺。堆石法多數用喺湖石或者珊瑚石，好似係海口五公祠珊瑚石山。疊石法主要用喺英石嘅壁山做法，嗌做「掛壁法」，最有嶺南嘅風韻，例如廣州賓館嘅三疊泉－呢種手法室外定室內都用得，前者有廣州嘅流花湖公園茶室嘅壁山，後者有白天鵝賓館石室嘅壁山。塑石法用灰泥同水泥扮石頭，慳石材，現代嶺南公園嘅兒童遊樂區嘅古洞探險幾乎都係用塑石。
其他特色
編輯園林建築
編輯由類型上嚟睇，嶺南園林入面有碉樓、船廳、廊橋呢啲建築物。碉樓源自碉堡，好似係可園嘅邀山閣、清暉園嘅留芬閣同立園嘅毓培樓；舫除咗好似江南園林咁嘅石舫之外，重有嶺南嘅舫，例如係寶墨園嘅紫洞艇。嶺南園林更加有與眾不同嘅船廳，佢將客廳同樓結合埋一齊，帶些少船意，多數係畀啲千金小姐用－所以有個花名叫「小姐樓」，好似係清暉園同餘蔭山房。亭嘅做法好冇規範，千奇百怪，有啲用迴廊、圍牆圍合嘅，又有角樑同枋穿插嘅，或者係少數民族式、俄羅斯式、甚至西歐式。橋喺古典嶺南園林入面多數同廊結合做廊頂石拱橋，好似係餘蔭山房就係典型，另外有少數民族嘅風雨樓同山區嘅索橋[6]。
就組合方式睇，嶺南園林興用「高牆冷巷」將建築院落進行多進多嘅庭院組合，或者用「連房博廈」將建築同庭院連做一體；就單體形態睇，多高柱礎，寬簷廊，厚實牆，青瓦頂，壓瓦磚，翹正脊，花玻窗，磚雕窗，灰塑門；就裝飾嚟睇，最典型嘅係「三雕三塑」：木雕、磚雕、石雕，陶塑、泥塑、灰塑。喺古典嶺南園林入面，三雕三塑遍布成個園林，喺門頭、門聯、窗楣、基座、台案、簷口、檐柱、月梁、瓜柱、雀替、坐靠、欄杆、屋脊都會有，其中以灰塑同磚雕最有嶺南味，例如係清暉園裏面嘅「蘇武牧羊」灰塑同板橋花園嘅瓜果磚雕漏窗。
| 嶺南園林嘅建築 | ||||||
|---|---|---|---|---|---|---|
|
字畫裝飾
編輯
古典嶺南園林入面字畫相對少啲，而現代嶺南園林更加少用，但係當中都有啲正嘅作品，例如係惠州小桃園後門聯「不深不淺湖水，半磚半閣人家」；餘蔭山房門聯「餘地三弓紅雨足，蔭天一角綠雲深」；荔灣湖公園海山仙館有對「荷花世界，荔子光陰」；可園邀山閣有對「大江前橫，明月直入」、雛月池館有對「大可浮家泛宅，豈肯隨波逐流」、正門又有對「十萬買鄰多佔水，一分起屋半栽花」；人境廬息亭有對聯「有三分水四分竹添七分明月，從五步樓十步閣望百步長江」；惠州西湖六如亭有「不增不減不生不滅不夠不淨，如夢如幻如泡如影如露如電」等等。
用嘅植物
編輯嶺南園林嘅植物畀人用「四季繁花，雨帶風光」八個字嚟概括。佢嘅特徵樹有棕櫚類嘅大王椰、假檳榔、大王棕、酒瓶椰呢啲；又有藤本嘅砲仗花、夜來香、紫藤、簕杜鵑、綠蘿呀咁；有耐陰嘅蘭花、蕉類、芋類、蕨類、葵類；另外重有榕樹同荔枝等。
哲學
編輯遠儒文化（粵拼：Jyun5 jyu4 man4 faa3）係嶺南學者對嶺南園林文化最精闢嘅闡釋，如果話江南園林同北方園林嘅儒意濃嘅話，嶺南園林嘅儒意就好淡。粵人傳統嚟講離政治中心（中原）遠，佢哋反叛嘅性格表現咗喺佢哋啲古典園林建築嘅唔規範同埋現代園林文聯匾對嘅唔重視。佢哋長期處於南邊嘅「蠻夷之族」嘅傳統，造就咗武家文化－表現喺清朝園林嘅碉樓形式同近代園林嘅「肥胖」立面同簡樸粗柱。遠儒性由品味上睇有人會話係俗－即係世俗文化（粵拼：Sai3 zuk6 man4 faa3）。呢種世俗文化係嶺南文化嘅主流，喺 19 世紀打後零舍明顯－北方嘅政客官僚，江南嘅文人騷客，嶺南嘅商家富豪成為咗三大地域園林嘅創作主體，嶺南園林嘅空間實用性同園宅一體嘅設計就係呢種文化嘅展現。
嶺南園林重受到嶺南哲學（粵拼：Ling5 naam4 zit3 hok6）嘅開放性、兼容性、同多元性影響[7]。最早表現喺南越國皇家園林對中原園林文化嘅全盤吸收嗰度。到咗 16 世紀之後，古典嶺南園林度大量咁用花色玻璃，形成咗同江南或者中原兩地好唔同嘅作風。另外，好似陳濟堂公館和張維立嘅立園咁嘅西歐式園林建築、龍巖中山公園嘅俄羅斯園林建築、草暖公園同雲台公園嘅西洋規劃佈局，同埋古典嶺南園林嗰度大量嘅滿洲窗都係開放同兼容嘅表現。
簡史
編輯據歷史記載，嶺南園林由南越國皇帝趙陀（？至公元前 137 年）開始起。佢效仿咗秦皇朝嘅皇宮室園林，喺越都番禺（今日嘅廣州）嗰度起勢咁起啲皇宮同園林。現存嘅九曜園嘅前身就係仙湖遺跡。嗰時佢將嶺南嘅皇家園林推咗上去頂峰。打後隨住南越國嘅衰亡，嶺南皇家園林亦都就咁銷聲匿跡。後尾嶺南做咗好幾代中原皇朝嘅主要對外港口，社會經濟愈嚟愈進步、文化藝術發展得好犀利，同海內外又有交流得好密，令到嶺南園林逐漸呈現出濃厚嘅地方民間色彩－形成家陣見到嘅古典嶺南園林[8]。
出名嘅嶺南園林
編輯
睇埋
編輯攷
編輯- ↑ 〈岭南园林的营造手法与艺术特色〉。原著喺2017年7月30號歸檔。喺2017年9月17號搵到。
- ↑ 劉庭風. (2003). 嶺南園林: 福建, 臺灣園林. 同濟大學出版社.
- ↑ Yuanyuan, C. (2008). Inspiration of Lingnan Garden to Inhabitation Landscape Design [J]. Huazhong Architecture, 11, 042.
- ↑ He, J. (2005). The Classic Chinese Lingnan Garden in Housing in Sustainable Development - A comparative study in Canton, China. The 2005 World Sustainable Building Conference.
- ↑ 薬洲 南国传经地，播种文明六百年 互聯網檔案館嘅歸檔，歸檔日期2015年1月19號，. - 《南方都市报》
- ↑ 周璐. (2012). 岭南园林特色探析. 绿色科技, (2), 53-54.
- ↑ 〈浅析清代岭南私家园林造园艺术〉。原著喺2017年9月20號歸檔。喺2017年9月20號搵到。
- ↑ Luo, S. Y., & Zhang, W. Y. (2008). The Impact of Ocean Culture to Lingnan Garden [J]. Guangdong Landscape Architecture, 6, 8-10.