水巨蜥

水巨蜥，俗稱五爪金龍，巨蜥，圓鼻巨蜥等，係蜥蜴中體型最大的其中一種，身長一般超過 1 米，有啲甚至可長達 4 米。個身灰色或啡色，身上佈滿唔係太完整嘅圓圈印斑，排成橫間。幼年時圖案好清晰，但長大後就逐漸變暗，甚至完全消失。尾部黃黑相間，長大後亦變得模糊。每趾都有巨大嘅爪，非常孔武有力，頸長，鱗甲成珠形，尾長而粗壯，大約等於身長嘅一半。

How to read a taxobox 水巨蜥
瀕危指標
最唔使理（Least Concern） (LC)
物種分類
界 動物界 門 脊索動物門 綱 爬蟲綱 科 巨蜥科 屬 巨蜥屬 種 V. salvator
二元學名
Varanus salvator （Laurenti，1768年）
水巨蜥嘅分布地

水巨蜥同原產印尼嘅科莫多巨蜥有親緣關係，但科莫多巨蜥更大條，而且會食人。

習性同食性

水巨蜥鍾意住響近森林邊嘅沼澤濕地，屬肉食性，會隨年紀改變飲食習慣。嘢食包括大型昆蟲、甲殼類、雀鳥以至小型哺乳動物，亦會進食動物屍體。水巨蜥係機會主義者，有襲擊雞隻同家畜嘅記錄。

識得爬樹同游水，若果受到威脅會變得非常有攻擊性。

繁殖

夏天繁殖，可以生 10 - 30 隻蛋，BB仔孵出嗰陣可以有 30 厘米長。

分布

中國南部（廣東、廣西、海南島、雲南）以至東南亞等地。佢哋可同時住響河流同鹹水沼澤，所以當地又叫佢做水怪。

香港嘅生態情況

喺嘉道理農場養嘅巨蜥

雖然水巨蜥係香港嘅原生品種，但係因為佢哋個樣比較得人驚，加上非法入口難以估計佢個種群，所以直到而家香港並無水巨蜥嘅詳細資料，只知佢係香港唯一嘅巨蜥品種。不過相信野生個體已經喺香港絕跡，第一次喺新界發現野生水巨蜥係 1961年，最近一次喺香港島出沒就喺1930年代左右，之後再冇記錄。因為香港嘅天然濕地已受到嚴重破壞而導致絕種，就算係米埔自然保護區呢個濕地生境良好嘅地方，亦好多年再冇發現過水巨蜥嘅蹤影。

現時喺野外發現到嘅水巨蜥可能係喺街市走甩或者俾人放生。雖然機會好微，但相信個別入口水巨蜥已適應咗香港嘅天然環境。位於香港食物鏈一定位置，可能同緬甸蟒蛇一樣，係年幼野豬嘅天然捕獵者。

2010年11月，粉嶺坪輋村公廁水坑爬行發現懷疑鱷魚動物，其後證實係一條4呎長嘅五爪金龍。嘉道理農場暨植物園同爬蟲館 (屯門公園)而家各養咗一條水巨蜥。

睇埋

• 香港爬蟲類

參考

• 《香港生態情報》
• 《香港的兩棲類及爬行類》