布列斯特－立陶夫斯克條約

布列斯特－立陶夫斯克條約
	條約嘅第一版
類型	和約
簽署日期	1918年3月3號
簽署地點	白俄羅斯嘅布列斯特
生效條件	批准
簽署者	Max Hoffman; ; 其他代表人物; Grigori Sokolnikov;
締約方	德意志帝國; 奧匈帝國; 保加利亞; 鄂圖曼帝國; 蘇俄;
語言	德文、匈牙利文、保加利亞文、土耳其文、同埋俄文

布列斯特－立陶夫斯克條約（俄文：Брестский мир；德文：Friedensvertrag von Brest-Litowsk），簡稱布列斯特條約，係蘇俄同埋同盟國之間喺1918年3月3號喺白俄羅斯布列斯特簽嘅和約，代表俄羅斯退出一次大戰，東方戰線正式打完。

背景

自從布爾什維克喺十月革命開始掌權以嚟，佢哋一直都談判緊停火，希望儘早俾俄羅斯（革命之後變咗做蘇俄）退出場仗。到1917年12月，佢哋終於同意咗停火，準備談判同簽和約。

當初談判嘅時候，德國嘅立場就係，俄國應該割讓所有同盟國已經控制緊嘅地區。但係，蘇俄方面並冇同意到，覺得條約太嚴格。相反，佢哋嘗試拖慢進度，希望能夠又唔簽和約又唔洗繼續打仗。同時，佢哋希望歐洲其他國家都同樣會出現共產革命。

當然，德國因爲知道俄國唔會肯簽，所以喺1918年2月曾經再一次發動過攻擊。俄國喺冇任何軍事準備底下，加上俄羅斯內戰嘅影響，令德軍可以基本上行入去俄國地頭。到3月頭，俄國終於認輸，肯同對方簽和約。

諷刺嘅係，俄國最終同意嘅條文，其實嚴格過佢哋原本拒絕咗嘅條文。

喺條約之下，俄國失去咗烏克蘭、波蘭、白俄羅斯、波羅的海國家、同埋高加索地區。呢啲土地包含咗俄國本身 34% 嘅人口、54% 嘅工業地、89% 嘅煤礦、同埋26% 嘅火車軌。除此之外，俄國亦承認咗芬蘭獨立，同時應承會停原本同烏克蘭人民共和國打緊嘅仗。

喺賠錢嘅議題上面，俄國同意會俾德國60億馬克。

呢份條約喺俄國非常受爭議，特別係嚟自反共嘅白軍。佢哋聲稱，呢個就係俄國應該繼續打仗對抗德軍嘅原因，同時批評紅軍嘅做法。

喺一次大戰打完嘅時候，同盟國最終都輸咗俾協約國。喺佢哋簽嘅《康邊停戰協定》之中，推翻咗布列斯特條約^[2]。之後，蘇俄嘗試攞返佢哋喺條約入面冇咗嘅地。佢哋成功贏返烏克蘭同埋高加索地區，但係就依然打唔贏波蘭同波羅的海國家。

喺1922年嘅一份條約，威瑪共和國同蘇聯同意放棄所有土地同錢銀嘅瓜葛。