廣州圖書館

廣州圖書館係中國廣州市政府設立嘅市級公共圖書館，喺廣東省廣州市天河區珠江新城花城廣場東側。2012年總流通人次達到337.6萬人次，總藏書量526.2萬冊。

舊館位於越秀區中山四路42號，喺1982年1月2號開館，2013年4月1號停用。而家喺珠江新城嘅新館係喺2012年12月初步開放，2013年6月全面開放。

歷史

1927年，廣州市長林雲陔為咗紀念孫中山，同埋促進文化事業，提議舉辦市立中山圖書館。經過市行政會議決定規劃籌辦。同年，派出募捐專員去美國、古巴、加拿大、墨西哥，得到華僑踴躍捐贈。1928年，成立廣州市立中山圖書館籌建委員為，林雲陔、杜定友等十六個人就作為委員。1929年，市立中山圖書館喺文德路原來廣府學宮嘅位置破圖動工。1933年10月15號，市立中山圖書館落成開幕，伍智梅任第一任館長。1934年，省圖書館被撤銷，其藏書33500冊由市館接收。1938年，廣州淪陷，市立中山圖書館停辦。