廣州話拼音方案

廣州話拼音方案又叫做廣州拼音方案，係中華人民共和國廣東省教育部喺1960年公佈嘅粵語拼音方案，用嚟拼寫廣州話嘅語音。實際上呢個方案嘅早期設置並唔科學，仲存在音素殘缺嘅問題。1980年代，饒秉才教授喺呢個方案嘅基礎上面進行大幅修改。而家睇到嘅廣州話拼音方案，就係經過饒秉才修訂之後嘅版本。有啲目前由中國大陸發行嘅非專業廣州話教程同字典，多數用呢個方案。同期發行嘅拼音方案仲有廣東嘅梅縣話（屬客家話系統）、潮汕話、海南話（以上屬閩語系統）嘅拼音方案。呢啲方案用相似或者唔同嘅音標原理，嚟表示啲話嘅音。

雖然廣州話拼音方案唔及得粵語耶魯拼法、教育學院拼音方案同粵拼等方案咁流行，但係佢仍然用喺一啲出版物度，特別係喺中國大陸出版嘅書。

方案內容

以下列出嘅方案內容，以饒秉才教授嘅1980年修訂版本做準，同時用註釋嚟標明1960年原方案嘅差異地方。

字母表

總共有26個字母，請睇下面個表：

字母表

字母	a	b	c	d	e	f	g	h	i	j	k	l	m	n	o	p	q	r	s	t	u	v	w	x	y	z

• r、v兩個字母用嚟拼寫普通話同外來語，拼寫廣州話嗰陣唔用。
• 廣州話拼音字母有三個附加符號字母：ê、é、ü，其中é同漢語拼音字母唔同。呢幾個字母係e、u字母嘅變體，未列入表內。
• 1960年版本嘅原方案入面，仲有一個附加符號字母：ô，係o字母嘅變體，亦都未列入表內。呢個字母喺80年版本度廢止咗。

聲母

唇音	b [p]	p [pʰ]	m [m]	f [f]
舌尖音	d [t]	t [tʰ]	n [n]	l [l]
舌根音	g [k]	k [kʰ]	ng [ŋ]	h [h]
圓唇舌根音	gu [ku]	ku [kʰu]
有噝擦音	z [ts]	c [tsʰ]	s [s]
	j [ts]	q [tsʰ]	x [s]
半元音			y [j]	w [w]

• z、c、s同j、q、x兩組聲音，廣州話嘅讀音冇區別，淨係喺拼寫韻母嗰陣唔同。z、c、s同韻母首音a、e、ê、é、o、u、ê相拼，j、q、x同韻母首音i、ü相拼。（有啲出版物忽略呢條規則，淨係用其中一組。）

• gu、ku係圓唇嘅舌根音，作為聲母使用，唔可以單獨注音。單獨注音時係音節，唔係聲母。

• y、w拼音時係當成聲母噉用，拼寫出來嘅音節相當於漢語拼音方案嘅複韻母。但係由於廣州話入面，呢啲韻母前面唔再拼聲母，因此淨係作為音節噉用。

韻母

韻母一定有韻腹，即係主要元音。有時都會有韻尾。

韻腹

韻腹即係韻母入面嘅主要元音，有a、e、ê、é、o、i、u、ü。

• 1960年版本嘅原方案入面，仲有一個韻腹：ô。呢個字母喺80年版本度廢止咗。

介音

方案入面，淨係得u係介音，佢只會喺聲母g或者k、韻尾首音係a、e、i或者o嘅音節度出現。喺其他拼音方案度，呢個介音通常同上述聲母合併做gw同kw，但係廣州話拼音方案依然保留佢。為求省略，有時gu同ku會畀人當做獨立聲母。

介音u也可以在冇聲母嘅時候出現，但係會當做同聲母w一樣。呢個原理，同介音i被當成聲母y，係一樣嘅。

韻尾

韻尾可以分開做元音韻尾同輔音韵尾。元音韻尾有i、u、ü三種，輔音韻尾可以細分成：鼻音韻尾m、n、ng同埋塞音韻尾b、d、g。(注意：呢個方案使用b、d、g表示[p̚]、[t̚]、[k̚]呢三個塞音韻尾，唔係用坊間常見嘅p、t、k。)

韻母列表

	無韻尾	i列	o/u列	m列	n列	ng列	b列	d列	g列
a行	a [ɑː]	ai [ɑːi]	ao [ɑːu]	am [ɑːm]	an [ɑːn]	ang [ɑːŋ]	ab [ɑːp̚]	ad [ɑːt̚]	ag [ɑːk̚]
e行		ei [ɐi]	eo① [ɐu]	em [ɐm]	en [ɐn]	eng [ɐŋ]	eb [ɐp̚]	ed [ɐt̚]	eg [ɐk̚]
é行	é [ɛː]	éi [ei]				éng [ɛːŋ]			ég [ɛːk]
i行	i [iː]		iu [iːu]	im [iːm]	in [iːn]	ing [ɪŋ]	ib [iːp̚]	id [iːt̚]	ig [ɪk̚]
o行	o [ɔː]	oi [ɔːi]	ou② [ou]		on [ɔːn]	ong③ [ɔːŋ]		od [ɔːt̚]	og [ɔːk̚]
u行	u [uː]	ui [uːi]			un [uːn]	ung④ [ʊŋ]		ud [uːt]	ug [ʊk̚]
ê行	ê [œː]		êu [ɵy]		ên [ɵn]	êng [œːŋ]		êd [ɵt̚]	êg [œːk̚]
ü行	ü [yː]				ün [yːn]			üd [yːt̚]
鼻音韻				m⑤ [m̩]		ng⑤ [ŋ̩]

• i行嘅韻母，前面冇聲母嗰陣，寫成yi、yiu、yim、yin、ying、yib、yid、yig。
• u行嘅韻母，前面冇聲母嗰陣，寫成wu、wui、wun、wud（ung、ug除外）。
• ü行嘅韻母，前面冇聲母嗰陣，寫成yu、yun、yud，ü嘅變音符號略去。
• ü行嘅韻母，同聲母j、q、x相拼嗰陣，ü嘅變音符號略去。
• êu本作êü，为咗減少字母嘅附加符號，ü嘅變音符號略去。
• m同ng是自成音節嘅鼻音韻母。

①1960年版本嘅原方案入面，eo拼寫成ou，e行韻腹唔統一。
②1960年版本嘅原方案入面，ou拼寫成ô，o行韻腹唔統一。
③1960年版本嘅原方案入面，ong拼寫成ông，o行韻腹唔統一。
④1960年版本嘅原方案入面，ung拼寫成ong，u行韻腹唔統一。
⑤1960年版本嘅原方案入面，係冇呢兩個韻母嘅，所以冇辦法拼寫呢兩個韻母嘅字。

聲調

聲調以阿拉伯數字 1 至 6 標示：

聲調表

聲調	陰平	陰上	陰去	陽平	陽上	陽去	陰入	中入	陽入
調值	55/53	35	33	21/11	13	22	5	3	2
漢字舉例	分	粉	訓	焚	奮	份	忽	發	佛
代表數字	1	2	3	4	5	6	1	3	6
拼音	fen1	fen2	fen3	fen4	fen5	fen6	fed1	fad3	fed6

實際上陰入、中入、陽入聲調嘅音高，同陰平、陰去、陽去係一樣嘅，不過係用-b、-d、-g 韻尾嘅入聲字用以區分。由於聲調嘅定義，係包括抑揚性（即實際音高）同頓挫性。而入聲韻尾-b、-d、-g正係影響咗佢嘅頓挫性。因此，即使只以1至6標示，但都係要話係有九個聲調，或者話有「九聲六調」，唔可以話只有六個聲調。

拼寫擧例

春曉 孟浩然	Cên1 Hiu2 Mang6 Hou6yin4
春眠不覺曉，	Cên1 min4 bed1 gog3 hiu2,
處處聞啼鳥。	cü3 cü3 men4 tei4 niu5.
夜來風雨聲，	Yé6 loi4 fung1 yu5 sing1,
花落知多少？	fa1 log6 zi1 do1 siu2?

參考

• 楊明新。簡明粵英詞典。廣州：廣東高等教育出版社，1999年。ISBN 7-5361-2350-7。

出面網頁

• 廣州話拼音方案
• 粵式濃濃