廣州起義路

廣州起義路（粵拼：gwong2 zau1 hei2 ji6 lou6）係中國廣東省廣州市入面嘅其中一條主幹道，呢條馬路喺越秀區入面，成條馬路係南北走向。南邊從一德路、海珠橋同埋泰康路嘅交界開始，一直向北去到中山五路嗰頭。

广州起义路 GUANGZHOU QIYI LU

廣州起義路嘅路牌

性質： 一般馬路 全長： 1.22公里 行車線： 4～5車道，南向北嘅單行綫。 地區： 廣州市越秀區 起點： 一德路同泰康路嘅交界 海珠橋嘅北邊 終點： 中山五路 主要建築： 廣州市公安局 廣東華僑中學 中國社會主義學院廣州分院 海珠廣場

概要

全長1220米，闊14～22米，4～5車道。成條路係單行綫，凈係可以從南邊向北邊行。其中喺每年嘅農曆新年期間，廣州嘅西湖路附近嘅廣州起義路（中山五路到惠福西路同埋惠福東路交界嗰橛）係唔畀行除咗的士之外嘅車。

史

喺1919年嗰陣，廣州市政府就開始拆咗啲内街，跟住就起條路出嚟，而咁啱呢條路就改咗名嗌「維新路」，嗰陣時係廣州入面其中一條最闊嘅馬路。而呢隻名嘅意思係因為條路穿過清代衙門入面笪空地，加上嗰陣時係啱啱推翻咗清朝冇耐，有維新變革嘅含義。喺1948年嗰陣改咗一次名嗌「中正路」。1950年嗰陣就改返名嗌「維新路」。到咗1966年，由於廣州公社同埋廣州起義入面誕生嘅廣州蘇維埃政府舊址都響度，所以條路就改咗名嗌「廣州起義路」。

特色

呢條馬路入面有好多間重要機構。其中條路嘅北邊有好多間搞印務、旗幟、禮儀用品嘅舖頭；而南邊嗰橛，受附近嘅高第街同埋大新路鞋業城影響，開咗好多檔賣鞋料同埋賣衫褲嘅。重有呢條路都比較彎下，係因為起條路嗰陣要留返間「千頃書院」（依家係中國社會主義學院廣州分院）喺度。

經過嘅道路

呢度啲路嘅順序係從南去到北嚟排嘅，其中加粗咗嘅字係主幹道：

• 一德路、泰康路、海珠橋
• 大新路
• 大德路
• 大南路
• 惠福西路、惠福東路
• 西湖路
• 中山五路