廣播

廣播（英文：Broadcasting）係用電訊技術由傳媒傳播聲音同視像畀大眾嘅行為，可以分做齋聲嘅無綫電廣播（電台廣播）同有聲有畫嘅電視廣播兩大類。皆因前者嘅技術出現先，有時講「廣播」兩字係專指「電台廣播」。

廣播發射站

無線廣播

内文：無綫電廣播

無線廣播，亦可以叫做電臺廣播，係一種用無線電波嚟發送資訊嘅模式，可以分做AM同FM兩大類。接收嘅最主要係收音機同電視，而用家只需要有天綫就會聼得到。

歷史

無線廣播最早可以追溯到1894年。當時，意大利嘅馬可尼開始利用無線電波嚟做資訊傳播，到1901年第一次將無線廣播跨過大西洋。到1904年，有公司開始將每日嘅新聞利用無線廣播傳去唔同做船務嘅人度，畀行船嘅人都可以聼到新聞。

到一次大戰，軍事需要令無線廣播嘅使用率大增。到戰後，就成為咗大眾傳媒嘅重要媒體。到二次大戰，軍事需要同樣令佢嘅使用率急升，包括飛機同地面嘅溝通同埋雷達。喺1930年代開始，FM開始取代AM廣播，到70年代已經係非常普遍。

喺舊時，所有廣播都係用模擬訊號，不過自從2000年開始，越嚟越多係用數碼訊號。

世界上用嚟廣播嘅容量由1986年到2007年期間，足足升咗4倍，由 4.32×10²⁰ 字節去到 1.9×10²¹ 字節。呢個等同每人每日由睇55份去到睇175份報紙咁多。

有線廣播

有線廣播（英文：Cable radio）係一種通過金屬導線或光纖將電台節目直接傳送畀用戶接收設備嘅廣播形式。

歷史

最早嘅有線廣播源自有線電話。有線廣播嘅創造者畀認為係波蘭裔嘅心理學家，哲學家，公關人員同發明家朱利安·奧霍羅維奇，佢喺電氣工程，電視，攝影同化學等領域表現出色，並發明咗雙模電池電話。1880年，佢成功研製用導線把劇院入面嘅音樂節目傳輸出去嘅播音設備，之後歐美各國劇院紛紛採用有線電話嘅方式傳送演出實況。