廣東音樂

廣東音樂就係專指流行於廣東珠江三角洲一帶嘅器樂曲，形成於清末十九世紀中後期，而家喺廣州、台山、香港、澳門等地依然流行，亦稱為「粵樂」。好多樂曲係由粵劇過場音樂、民歌等等演變而來嘅。通常來講，廣東音樂音色清脆明亮，節奏活潑歡樂。

樂器同演奏技巧

樂器方面，廣東音樂早期常用嘅樂器有二弦、提琴、月琴、橫簫（即係笛子）同三弦，又稱為「五架頭」。由於二弦嘅聲音比較粗獷，後人叫佢做「硬弓」。1926年，喺上海長大嘅呂文成將滬人演奏嘅二胡傳入香港、廣州，並且改用鋼弦，今人稱之為高胡（又叫粵胡），高胡嘅音色比較細膩，所以又叫「軟弓」。高胡係主奏樂器，加埋揚琴同秦琴，稱為「三件頭」。除咗上述樂器，常用嘅樂器重有喉管、洞簫、椰胡、琵琶等等。敲擊方面就常用卜魚、沙的、碰鈴、木魚。由於廣東地區同外國通商較早，廣東音樂亦都受到西方音樂影響，有時會運用西方樂器，比如小提琴（又譯作「梵鈴」，violin）、色士風（saxophone）、木片琴、結他等等。

樂曲結構同演奏風格

廣東音樂嘅樂曲多數係器樂小品，結構短小，大多數樂曲一氣呵成，但亦有尐樂曲速度、板式（節拍）變化多端，好似《雙聲恨》、《昭君怨》等等。廣東音樂經常表現出跳躍嘅、活潑嘅旋律，例如經常大幅度嘅音高跳動。演奏者喺演奏時會即興「加花」，即係加上裝飾音，令旋律更加豐富。

著名音樂家及樂曲

《彩雲追月》

著名嘅曲目有清末嚴老烈創作嘅《旱天雷》、《餓馬搖鈴》、《漢宮秋月》、《雨打巴蕉》等，民國1920年代呂文成創作嘅《平湖秋月》、《步步高》、《醒獅》，以及聶耳創作嘅《金蛇狂舞》等。余其偉、陳錦標、麥偉鑄等等近年亦試過創作廣東音樂。

廣東音樂有一點同其他中樂風格唔同嘅係，廣東音樂出到一批專職嘅作曲家寫歌。喺漢人歷史上，音樂方面嘅職業普遍都低賤一啲，例如琵琶女係妓藉，係一種「賤戶」，搞到多數民系嘅傳統音樂都係舊時曲牌，好少可會有作者署名；相比之下，歐洲人－無論西歐定東歐－喺呢方面好唔同，好似奧地利嘅莫札特同俄羅斯嘅柴可夫斯基都入得到宮廷嘅，音樂職業一啲都唔低賤。廣東音樂呢一點有少少畀歐洲影響到，音樂人嘅地位比較高，有好似嚴老烈、何氏三傑等嘅作曲家出到頭，有得喺啲作品嗰度署名。

廣東音樂曲目

• 旱天雷
• 三潭印月
• 餓馬搖鈴
• 漢宮秋月
• 雨打大蕉
• 賽龍奪錦
• 娛樂升平
• 平湖秋月
• 醒獅
• 步步高
• 金蛇狂舞
• 禪院鐘聲
• 分飛燕

睇埋

• 廣東民族樂團
• 古典樂

出面網頁

• 廣東音樂多面睇
• 康樂及文化事務署－廣東音樂系列