張惠長

張惠長（1899年5月6號—1980年7月18號），字錦威，廣東省香山縣人。中華民國飛機師、外交官、政治人物。

《中國名人錄（第四版）》入邊嘅張惠長相片

生平

1915年，張惠長同楊仙逸一齊被送往林森奉命喺美國成立嘅空軍學校學習飛行技術，後來張惠長又轉入美國寇蒂斯航空學校學習。1917年回國，任孫中山大元帥府侍從副官。1918年，任大元帥府航空處副處長，曾揸飛機協同陸軍討伐龍濟光。1920年，任粵軍飛機隊第一隊隊長。1922年，任廣州航空局副局長、第一隊隊長、代局長。中國國民黨改組後，佢去蘇聯學習。1928年回國後任航空學校首任校長。1928年6月，任航空司令。仲做過國民革命軍第八路軍總指揮部航空處處長。1928年11月11號，以張惠長為機長嘅「廣州」號陸上飛機從廣州大沙頭機場起飛，經十二個省最後抵達南京，成為中國航空史上里程碑。1929年8月24號，出任軍政部航空署署長。1929年9月10號，出任中國航空公司副理事長。

1929年，張惠長參加張發奎、李宗仁嘅反蔣軍作戰。1930年，張惠長參加中原大戰。1931年6月，任廣州非常會議國民政府空軍總司令、軍事委員會西南分會委員。同年，當選為中國國民黨第四屆中央執行委員。1932年任西南政務委員會常務委員。1933年4月29號，獲聘為全國航空建設委員會委員。同年底，閩變發生，張惠長喺閩變中，向全國發出「空軍人員暫不參加内戰」嘅通電，並動員廣東空軍近百人脫離廣東軍政府陳濟棠手下嘅航空局，轉投閩變中喺福州成立嘅中華共和國人民革命政府。

1935年，張惠長任中華民國駐古巴全權公使。1937年任滿歸國，任中山縣縣長。抗日戰爭期間，再任駐古巴公使。後回國再任中山縣縣長。1946年冬，又被任命為駐古巴公使，但未赴任。1947年初，被撤銷中山縣縣長職務。1947年4月24號，任立法院立法委員。1948年3月，當選第一屆國民大會代表。佢一直留喺中山縣。中國人民解放軍佔領中山縣前夕，張惠長赴澳門定居。1960年前後赴台灣，繼續擔任國民大會代表。

1980年7月18號，張惠長病逝。