張永霖

張永霖，JP（Linus Cheung，1948年—）係香港亞洲電視前主席、揮揚企業有限公司主席、香港興業國際集團、中國聯通股份有限公司、泰康人壽保險股份有限公司同埋安達國際有限公司獨立非執行董事。佢亦係香港大學校董會成員同埋香港中文大學嘅兼任教授。

張永霖
母校	香港大學
職業	電視主持、太平紳士
[改維基數據]

  提示：呢篇文講嘅唔係張智霖或張作霖。

生平

張永霖1971年喺香港大學畢業後，加入咗國泰航空公司工作咗23年，其間曾經喺1989年至到1990年，獲當時香港總督衛奕信嘅邀請，被全職借調入香港政府嘅中央政策組工作。1999年，張生喺DHL/南華早報舉行嘅評選活動之中，獲評為嗰個年度嘅「香港最佳行政人員」；更加喺1998年同1999年，連續兩年俾亞洲電訊雜誌《Telecom Asia》選為「亞洲最佳電訊行政總裁」。張永霖曾經擔任國泰航空副董事總經理，1994年轉任香港電訊（電訊盈科）行政總裁。2000年8月，盈科數碼同香港電訊合併做電訊盈科，佢出任香港電訊盈科副主席，直至2004年2月辭職，而同年佢亦獲頒授榮譽院士學位。

張永霖一直被喻為「打工皇帝」，但佢早年讀大學亦唔係一帆風順嘅，其中兩年嘅預科生涯，就轉過三間中學。張永霖話，佢自己喺18歲時面對升學問題，同而家嘅青年一樣咁徬徨。中六時，佢由高主教書院轉到聖馬可中學，其後又因為當時聖馬可中學無中七課程，所以又由聖馬可中學轉到聖士提反女校，繼續佢中七嘅課程。

經歷兩年崎嶇嘅預科生涯之後，張永霖終於考入咗香港大學，但又要因為要畀每日五蚊嘅宿舍費同五蚊嘅飲食費而四處張羅。為應付呢個開支，張永霖唔介意，夜晚更去西區街坊福利會教英文。

張永霖話，做人要不斷努力，不斷求上進，先至會有成功嘅一日。佢以自己為例，大學畢業之後十幾年，仍然唔識講普通話，為咗要練好普通話，張永霖就由最基本嘅拼音、韻母、聲母開始。直至而家，佢已可以用普通話背書，亦可以用純正嘅普通話同朋友談三個鐘頭。佢指呢一啲嘅成功，都係自己努力得來嘅。

張永霖而家亦喺香港電台主持節目《張永霖的世界》，同聽眾分享佢嘅人生經歷，同埋對人對事嘅一啲睇法。

著作

• 《成功路──張永霖的世界1》，天地圖書有限公司2007年7月初版，ISBN 978-988-211-682-5

個人榮譽

• 香港大學名譽大學院士（2003年）