彭羕
彭羕（羕讀讓，粵拼：paang4 joeng6；？—？），字永年（wing5 nin4），《三國演義》寫成字永言（wing5 jin4），廣漢人（而家四川廣漢北面），係三國時蜀漢嘅官員。
| 彭羕 | |
|---|---|
| 蜀漢 官員 | |
| 遞啲名 | |
| 字 | 永年 |
生平同事蹟
編輯彭羕佢身長八尺，容貌魁梧，生性驕傲，睇唔起每個人，只敬重同郡人秦宓，因爲秦宓曾經向太守許靖推舉佢[1]。
劉璋喺度時，彭羕喺益州做官，職位最高不過係書佐。後來佢畀各個人講醜話，州牧劉璋聽到呢啲衰嘢，結果彭羕畀劉璋罰割鬚髮、再貶做奴隸[2]。
214年，劉備入蜀，想企穩陣先再向北打張魯。彭羕想謁見劉備，於是去搵龐統。龐統唔識得彭羕，又有緊客，彭羕直接行上到龐統瞓緊嘅床[3]，同龐統講：「等啲客走咗，會同先生你傾下偈。」[4]
啲客走咗後，龐統走去共彭羕坐，彭羕又想食飯先，然後先傾偈，因噉樣留低過夜，遞日又留咗成日。龐統十分之讚賞彭羕，而法正本就知佢，結果共同同劉備進舉彭羕。劉備亦都話彭羕係奇才，幾次落令畀佢去宣傳軍務，調動諸將；彭羕做嘢亦合劉備意，時日長咗，對佢嘅禮遇越好，身價越高。之後佔得成都，劉備領職益州牧，提拔彭羕做治中從事[5]。
彭羕自囚徒身份，突然成爲地位高嘅人，得得戚而驕傲自得，越來越囂張過份。諸葛亮外面睇會接待彭羕，但喺心目中唔鍾意佢；多次同劉備靜雞雞講，彭羕心大志高，已經越過佢本身嘅才能。劉備信任諸葛亮，又睇真啲彭羕做嘢，慢慢冷落咗佢。後來劉備降職佢，掟佢出做江陽太守[6]。
彭羕知道就來上路，個心度好唔開心，去探馬超。馬超問：「先生有過人嘅才能，主公對待先生亦好睇重，話先生可以共孔明、孝直[7]睇齊，爲何又派出外、只認授一個細郡，令大家失望呢？」彭羕答：「嗰隻老兵[8]荒唐無理，旨意佢做得成咩啊！計我話先生你喺外邊，我喺裏邊，天下重唔足以平定！」[9]
馬超啱降蜀無耐，心度經常唔穩陣，聽彭羕講呢啲嘢時大驚，於是保持沉默唔答佢。彭羕走咗，馬超將呢啲表述話曬畀人知，於是彭羕佢捉咗收監[10]。
彭羕喺獄中寄信畀諸葛亮來講清楚佢嘅用意、心願同埋佢嘅懺悔反思，但噉做都無結果。最後彭羕被殺，享年37歲（虛歲）[11]。
參攷資料
編輯- 陳壽。〈蜀書十：劉彭廖李劉魏楊傳 — 彭羕傳〉. 《《[[三國志]]》》。
註攷
編輯- ↑ 陳壽。〈蜀書十：劉彭廖李劉魏楊傳 — 彭羕傳〉. 《《三國志》》。｢身長八尺，容貌甚偉。姿性驕傲，多所輕忽，惟敬同郡秦子敕，薦之於太守許靖曰：……｣
- ↑ 陳壽。〈蜀書十：劉彭廖李劉魏楊傳 — 彭羕傳〉. 《《三國志》》。｢羕仕州，不過書佐，後又為眾人所謗毀於州牧劉璋，璋髡鉗羕為徒隸。｣
- ↑ 古人嘅床係矮傢俬，可以瞓同坐，可以放喺會客嘅地方，同而家睡房瞓覺嘅床有啲唔同。
- ↑ 陳壽。〈蜀書十：劉彭廖李劉魏楊傳 — 彭羕傳〉. 《《三國志》》。｢會先主入蜀，溯流北行。羕欲納說先主，乃往見龐統。統與羕非故人，又適有賓客，羕徑上統床臥，謂統曰：『須客罷當與卿善談。』｣
- ↑ 陳壽。〈蜀書十：劉彭廖李劉魏楊傳 — 彭羕傳〉. 《《三國志》》。｢統客既罷，往就羕坐，羕又先責統食，然後共語，因留信宿，至於經日。統大善之，而法正宿自知羕，遂並致之先主。先主亦以為奇，數令羕宣傳軍事，指授諸將，奉使稱意，識遇日加。成都既定，先主領益州牧，拔羕為治中從事。｣
- ↑ 陳壽。〈蜀書十：劉彭廖李劉魏楊傳 — 彭羕傳〉. 《《三國志》》。｢羕起徒步，一朝處州人之上，形色囂然，自矜得遇滋甚。諸葛亮雖外接待羕，而內不能善。屢密言先主，羕心大志廣，難可保安。先主既敬信亮，加察羕行事，意以稍疏，左遷羕為江陽太守。｣
- ↑ 法孝直，即法正。
- ↑ 暗指劉備，呢個詞發洩不滿。
- ↑ 陳壽（著）；裴松之（注）。〈蜀書十：劉彭廖李劉魏楊傳 — 彭羕傳〉. 《《三國志》》。｢羕聞當遠出，私情不悅，往詣馬超。超問羕曰：『卿才具秀拔，主公相待至重，謂卿當與孔明、孝直諸人齊足並驅，寧當外授小郡，失人本望乎？』羕曰：『老革荒悖，可複道邪！』〈揚雄方言曰：悈、鰓、乾、都、耇、革，老也。郭璞注曰：皆老者皮毛枯瘁之形也。臣松之以為皮去毛曰革。古者以革為兵，故語稱兵革，革猶兵也。羕罵備為老革，猶言老兵也。〉又謂超曰：『卿為其外，我為其內，天下不足定也。』｣
- ↑ 陳壽。〈蜀書十：劉彭廖李劉魏楊傳 — 彭羕傳〉. 《《三國志》》。｢超羈旅歸國，常懷危懼，聞羕言大驚，默然不答。羕退，具表羕辭，於是收羕付有司。｣
- ↑ 陳壽。〈蜀書十：劉彭廖李劉魏楊傳 — 彭羕傳〉. 《《三國志》》。｢羕於獄中與諸葛亮書曰：……羕竟誅死，時年三十七。｣