心理分析

心理分析（psychoanalysis），粵文又叫精神分析，係精神病學入面研究潛意識嘅方式，由奧地利神經學家佛洛伊德開始研究出嚟。到咗廿一世紀，心理分析因為缺乏可否證性而冇乜心理學家會用。

可否證性

根據精神分析理論，人嘅潛意識度有好多俾人壓抑住嘅慾望，而且精神分析理論仲好興講話呢柞慾望可以引致精神病，但古典嗰套精神分析理論對於點樣量度呢柞慾望同埋「慾望有幾俾人壓抑」就冇乜嘢標準。例如係抑鬱症噉：精神分析話抑鬱症可以係因為人壓抑自己嘅慾望壓抑得勁得滯而搞出嚟嘅，但喺實際應上表明咗，就算個病人冇抑鬱症嘅症狀，個分析師都有得話「係因為個慾望太過壓抑，壓抑到出唔到症狀」－所以根本冇可能知個分析師係唔係真係做咗一個準確嘅預測。呢個理論冇提出一個方案去量度壓抑，搞到用套理論嘅根本冇辦法知個病人係唔係真係壓抑咗啲慾望，冇得量度就自然冇得驗證佢係咪真。到咗廿一世紀初，心理學上嘅研究都唔會再理精神分析呢套理論，會當套理論係假科學（pseudoscience）－望落似科學，但查實唔合科學原則嘅學說。