心經

《心經》係大乘佛敎佛經之一，講嘅係佛家要義，係佛家最核心思想，所以叫《心經》。《心經》分廣本同略本。廣本取材自《大般若經》（महाप्रज्ञापारमिता，maha prajñā pāramitā，大對譯為摩訶，即摩訶般若波羅蜜多經），原本由梵文悉曇體所寫。而略本可能係大般若經中文本省節出來，再譯返梵文，之不過呢個講法，未為全部人接受。

《心經》係最常用嘅簡名，梵名叫प्रज्ञापारमिताहृदयसूत्र（prajñā pāramitā hṛdayasutra），最常見全譯名係唐玄奘嘅《般若波羅蜜多心經》，其餘多數係般若、波羅蜜多、心等字嘅組合。因為佢出自《大般若經》，亦有啲有大、摩訶等字。

《心經》唔係好長，玄奘略本只有二百六十字，但記低佛門精要，所以廣為流傳。

名

廣東話唔少柯音字（o），舊時係讀丫音（a）。好似軚（tai）查實係舵（to）舊音。

《大般若經》，महाप्रज्ञापारमिता（maha prajñā pāramitā）：

• महा（maha）意譯做大，古音譯摩訶，廣東話讀似馬哈。佢同同屬印歐語系英文等mega同源。
• प्रज्ञा（prajñā）意譯做妙智慧，不可言喻嘅智慧。古音譯般若，北方話好多時破讀波惹。廣東話可以唔跟。
• पारमिता（pāramitā）意譯到彼岸。古音譯波羅蜜多，以今日廣東話，約莫係巴拉滅打。
• सूत्र（sutra）意譯為經，手稿嘅意思。

而《心經》，प्रज्ञापारमिताहृदयसूत्र（prajñā pāramitā hṛdaya sutra），少咗個महा（maha，大），多咗個हृदय（hṛdaya，心）。

• हृदय（hṛdaya）意譯心。

版本

廣本同一段佛經一樣，有序分、正宗分同埋流通分三部份，約莫係背景、主文同埋總結。而略本留有正宗分，將序分同流通分減省。

現時最出名嘅略本，係玄奘所譯，一共有二百六十字。而玄奘譯本，係同更早年嘅鳩摩羅什譯本類似。