怡和午炮
怡和午炮（The Jardine Noonday Gun）喺香港銅鑼灣避風塘嘅岸邊，屬於怡和洋行所有嘅一座炮台，係每日中午12點鳴放禮炮，所以叫怡和午炮，鳴炮前會搖8響鐘，起源自東角年代嘅怡和總寫字樓同倉庫，表示上晝工作時段結束。除咗每日鳴放嘅午炮外，每年除夕最後一分鐘重有加放炮，叫做「子夜鳴炮」迎接新年。呢個係香港其中一個特色旅遊景點，而家只要捐某個金額畀「思健」（MINDSET），就可以安排鳴放禮炮，自1989年開始，已經籌得超過500萬港元善款。
典故
編輯怡和公司1841年喺香港成立，怡和洋行由香港政府買入銅鑼灣岸邊土地，興建渣甸貨倉，設有運貨碼頭，用嚟起卸貨船上貨物。為咗對付海盜，怡和洋行就喺嗰處設一座炮台。而每當公司自己嘅船出入碼頭，都會放禮炮。1850年代有一日，怡和洋行總經理羅拔渣甸爵士啱啱由英國返香港，員工就為佢放咗廿一響禮炮。就噉，英軍不滿，認為怡和洋行只係商行，冇權放禮炮。由於當時嘅海事禮節規定：只得英國皇室人員或皇家高級海軍先有鳴炮致敬嘅殊榮。怡和洋行為表示歉意，就負責喺每日中午十二點正放禮炮報時，作為自我懲罰。當時嘅禮炮長三尺，炮聲大到維多利亞港兩岸都聽到。1941年，日軍佔香港，將大炮拎走，至今下落不明。1945年香港重光之後，英國海軍送一座六磅型大炮畀怡和，令怡和午炮嘅傳統可以延續。1947年7月1號，怡和午炮恢復正常運作，一直至今。
花絮
編輯自1989年起，怡和集團支持香港公益金籌款活動，任何人士捐贈超過三萬三千元畀公益金，就會獲邀主持鳴炮儀式，亦可保留刻上佢個名嘅複製炮殼做紀念。另外，由於香港警察樂隊支持呢個公益活動，如日子許可會派出一個風笛手助興，但係佢嘅交通費就由捐款人負責。
交通
編輯搭港鐵去到銅鑼灣站D1出口（或者搭其他交通工具到銅鑼灣），然後行到去告士打道怡東酒店嘅地下停車場入口，沿住樓梯向下行，去到停車場轉右就見到行人隧道，之後就去到炮台。