扣帽

扣帽（粵拼：kau³ mou²；英文：poisoning the well，個英文名字面係「喺個井度落毒」噉解）係一種非型式謬論，指講緊謬論嗰個人將一啲同佢個對手相關（但係實際上根本唔啦更）嘅負面訊息講出嚟，等身邊睇緊場討論嘅人覺得佢對手唔可信，諗住籍此打敗佢對手－但係就算真係俾佢靠噉赢咗場討論都好，佢查實由頭到尾都冇真正回應過佢對手嘅論證，只不過係喺度引開咗啲人嘅注意力，令到啲人睇唔到佢嘅論證有問題。

英格蘭神學家 John Henry Newman 嘅畫像

英文「poisoning the well」呢個詞係喺 1864 年由英格蘭神學家 John Henry Newman 喺佢本《Apologia Pro Vita Sua》（拉丁文：一個人對自己人生嘅辯護）嗰度第一次俾人用嚟指一種謬論嘅，Newman 佢將「靠講對手嘅唔好嘢嚟嘗試打敗對手個論證」呢種行為比喻成好似啲軍隊喺打仗嗰陣喺就嚟要俾敵軍攻陷嘅城嘅井嗰度落毒噉，係一種陰險嘅行為。

扣帽可以話係人身攻擊謬論（ad hominem）嘅一種。

概論

扣帽俾哲學家視為一種謬論，而且可以有好幾種型態。最常見嗰種型態係噉嘅：

1. 同佢對手身份相關嘅負面訊息。（例：「喺你哋聽我對手講嘢之前，我想提吓你哋呢條友坐過監。」）
2. 所以佢對手做嘅所有宣稱都係錯嘅。

呢種思考方式有問題：世界上嘅人幾乎冚唪唥都做過衰嘢，所以如果一個人做過衰嘢就等如佢講嘅所有嘢都係假嘅話，噉呢個世界唔會有信得過嘅宣稱。

除咗噉，有陣時啲講謬論嘅人仲會用呢種手法攻擊將來可能出現嘅對手。例：「以上係我對同性婚姻嘅立場，唔同意我個立場嘅人實係想破壞家庭結構嘅」，而跟手當有個人提出反對聲音嗰陣，用緊扣帽謬論嗰個人就會話佢想破壞家庭結構－就算個新論證同家庭冇直接關係嘅都好。

隨意喺人身上貼標籤嘅手法好普遍、歷史久遠。根據美國宣傳分析中心喺 1937 年出版嗰本《The Fine Art of Propaganda》（粵文翻譯：宣傳嘅藝術）當中歸納嘅七大宣傳手法入面，貼標籤就名列第一，屬於最常出現喺宣傳上嘅文字遊戲。美國宣傳分析中心認為，貼標籤喺歷史同個人嘅人格發展上都有住極之大嘅影響力。貼標籤不但可以摧毀一個人嘅名譽，有陣時仲可以激勵一個人達到非凡嘅成就、搞到人坐監、或者令人發癲屠殺自己嘅同伴。標籤有得貼喺一個人身上，又有得貼喺團體、幫派、部落、政黨、城邦、甚至國家或者種族身上。

例子

以下係一啲扣帽嘅例子：

例子 1

A 君：老細，你聽到我講咗噉多嘢，就知 B 君先係你應該炒嗰個人啦。我肯定阿 B 君實會嚟你呢度講啲大話諗住逃避個責任嘅，佢之前講過大話，唔好聽佢噏。

喺呢句嘢當中，A 君喺度做緊扣帽嘅動作，諗住喺 B 君有機會發現之前就攻擊 B 君嘅品格，並且靠噉嚟嘗試否定 B 君可能會講嘅所有嘢。如果佢老細真係聽佢噏而就噉否決嗮 B 君講嘅嘢嘅話，佢老細都係犯咗扣帽嘅謬論。

例子 2

A 君：我諗我啲論證都夠充分㗎喇，等睇我對手點樣嘗試用佢嗰啲荒謬嘅歷史嚟詏赢啦。

喺呢句嘢當中，A 君喺度嘗試「喺個井度落毒」：就算佢對手真係曾經喺歷史知識上犯過錯都好，都唔等如佢對手今次唔會講到啲有道理嘅論證出嚟。

睇埋

• 認知偏誤
• 情報操作
• 謬論
  • 唔啦更謬論
  • 人身攻擊謬論
  • 訴諸嘲弄
• 黑色宣傳
• 標籤效應
• 砌生豬肉

拎

• Newman Reader – Apologia (1865) – Preface.
• Name-Calling, Propaganda Critic.
• Name-Calling, Source Watch.