拍子機

拍子機^{[註 1]}，又叫拍節機、節拍機或者拍擊器，係一種會識打拍子嘅架生，分機械式、電動同電子三種^[1]（主要係機械式同電子兩種，電子包括實體機、網站、手機應用程式等等），按指定速度發聲，用嚟幫音樂家練習嗰陣提供節拍。

不過，提供節拍嘅目的並唔係要跟住部機，而係測cek1住自己嘅拍子準唔準^[2]，等可以熟悉自己嘅反應時間等自己嘅時間可以準啲^[3]，又可以緞練數拍子嘅能力同自己嘅節奏感^[4]^[5]，同習慣同一種自己以外嘅聲夾，等個樂手同其他樂手夾嘅時候習慣咗同人夾，人哋又易啲同佢夾^[4]。

作曲家可以用速度記號寫明佢心目中嘅速度應該係乜，等樂手可以用拍子機幫手數拍子；貝多芬係已知第一個作曲家用速度記號。不過喺表演嗰陣好多時都唔多理呢啲速度指示，尤其係慢嘅樂章。

功能

呢部機械式最底睇到嘅係 160、168、176、184、192；呢啲刻度中間嘅位冇嘢卡住，冇可能設定到

呢種用扭掣㨂速度嘅電子拍子機同機械式一樣，刻度中間嘅速度冇嘢卡住，冇可能設定到

拍子機嘅基本功能係按指定嘅速度發聲。呢聲喺機械式拍子機通常係｢喥dok6｣一聲，而喺電子拍子機就通常係｢咇｣一聲。有啲機械式拍子機同大部分嘅電子拍子機可以設定一小節有幾多拍^{[註 2]}，小節第一拍會唔同聲，呢下唔同聲喺機械式拍子機通常係｢叮｣一聲，而喺電子拍子機就通常係尖啲嘅｢咇｣一聲。

電子拍子機通常有種相反功能，音樂人可以自己一路打拍子，一路撳某粒掣^{[註 3]}，部機會話返畀個人知撳出嚟嘅拍子係每分鐘幾多拍^[6]。

設定速度方面，機械式拍子機會喺常用嘅速度會有刻度，啲刻度有凹位卡住粒類似砝碼嘅嘢，所以設定呢啲速度先會準，即係例如想設定每分鐘 95 拍其實係冇可能嘅，因為冇位卡住，亦唔知個位喺邊；電子拍子機就通常每分鐘拍數係遂拍加減，可以設定任何合理數值，例如每分鐘 95 拍唔會有問題。

電子拍子機可以有其他功能，例如每拍出嘅聲係再細分幾份，又或者每拍出嘅聲係跟某種節奏，又或者不規則拍子^{[註 4]}可以㨂拆唔拆同點樣拆，又或者可以幫手調音等等。

1812年，永高（Dietrich Nikolaus Winkel）響阿姆斯特丹發明拍子機，不過佢無做專利，所以1816年美舍（Johann Mälzel）就用咗佢個設計整可以周圍拎嘅拍節機，重做埋專利，即係今時今日嘅美舍拍子機。

葉紹羲等人 (2023年9月8號)。《不能與拍子機一起練習？如何不被拍子機干擾？》。喺2024年8月25號搵到。
Good, Kale (November 6, 2023). "How to master the metronome: A learner's guide" (美國英文). 喺2024年8月25號搵到.
Lewis, Martha Beth (n.d.). "All About Metronomes" (美國英文). 喺2024年8月25號搵到.
Onotera, Steve (2022年7月12號). If You Have No Time, Practice Like This (加拿大英文). 喺2024年8月25號搵到.
Onotera, Steve (2024年1月18號). Three exercises that will change your life (加拿大英文). 喺2024年8月25號搵到.