摩納哥

摩納哥公國（法文：Principauté de Monaco；摩納哥文：Principatu de Mu̍negu），簡稱摩納哥，係一個城邦國家，歐洲嘅微型國家之一，兼係世界上人口最稠密嘅國家之一。摩納哥屬亞熱帶地中海式氣候，夏天乾燥涼爽，冬天潮濕溫暖。年均氣溫係16攝氏度，年均降水量係500至600毫米。

地理位置改

摩納哥係全世界第三最細嘅國家（僅次於梵蒂岡同埋聖馬力諾）。摩納哥位於法國南面，除咗靠地中海嘅南部海岸線之外，全境北、西、東三面都畀法國圍住，主要係由摩納哥舊城同隨後建立嘅週遭地區組成。

摩納哥地形狹長，東西長大約3千米，南北最窄嗰度得200米。境內好多山仔，平均海拔唔夠500米。

摩納哥全國分咗做四區：摩納哥維爾（Monaco-Ville）、蒙地卡羅（Monte-Carlo）、康達敏（La Condamine）同埋芳薇耶（Fontvieille），其中又以蒙地卡羅最出名。一年一次嘅蒙地卡羅大賽車，用呢區嘅街巷當做比賽跑道，刺激精彩唔可以一般而論；重有豪華嘅賭場，知名度之高，連賭城拉斯維加斯都有一間飯店就叫做蒙地卡羅。

旅遊改

摩納哥邊境無警衛、海關，當然就唔使簽證入境，至於水電、軍隊同埋貨幣就同法國共用，唯一有摩納哥風味嘅係佢嘅郵票同埋郵戳，而且價錢合理，最好嘅紀念品就係從呢度寄返張明信片返去。

經濟改

摩納哥王室喺1870年取消徵收國民嘅所得稅，將摩納哥變做有錢人嘅避稅天堂，間接噉刺激咗呢個小國嘅經濟發展。