敬羅家塾
大埔頭祠堂兼舊時家墊
敬羅家塾喺香港新界大埔大埔頭村，大埔頭徑邊，係呢條村鄧族嘅祠堂同家塾，喺1998年7月21號被評為香港法定古蹟。佢哋鄧氏族人原本住喺元朗錦田，十三世紀左右先搬去大埔，建立咗水圍（又叫老圍）。二十世紀頭，因要起九廣鐵路，水圍就被迫分開咗水圍同大埔頭兩條村。加上發展迅速，大埔頭啲村民就將原來間屋改建咗或者加起丁屋，成為新式嘅村屋。
敬羅家塾傳聞係喺明朝嗰時由鄧氏第十三代族人玄雲、梅溪同念峰為咗紀念第十代先祖敬羅公而起嘅，敬羅公譽為大埔頭鄧族流光堂嘅開山祖。敬羅家塾原本係用嚟做族人家塾用嘅，用舊式卜卜齋教學，曾經有成40個子弟返學。除咗用作課室之外，亦係族人搞聚會同埋搞慶節活動舉行嘅地方。敬羅家塾曾經做過「啟智學校」嘅校舍，喺1953年搬咗出去之後就做番祠堂。
-
大埔頭村近貌 -
喺村前方嘅啟智學校
