數碼港海濱長廊

數碼港海濱長廊，香港公園之一，遊樂場之一，喺數碼港，亦即鋼綫灣、大口灣填地之上，佔地六十萬呎，英文叫Cyberport Waterfront Park，亦有人叫佢數碼港公園。笪地原本係用來起四號幹綫，因為喺一九九九年決定起數碼港，而變為公園。公園歸數碼港電訊盈科管理，唔係香港政府管。

大草坪吸引唔少人放紙鷂、放狗玩

庭園

數碼港互動遊樂場

史

公園原為四號幹線預留地，政府於二〇〇三年九月，向電訊盈科批出短期合約，將數碼港對出預留地，用來做「靜態康樂及園景」之用，要開放畀公眾。不過無規定公園用料。公園二〇〇五年二月局部開放，設歐式庭園，初期用塑膠植物，有假青松、亦有牡丹、百合。到五月底，有準新人喺處影相，發現園內塑膠植物，暴曬下出臭味，其後畀傳媒揭發。負責管理公園盈科大衍地產發展有限公司就回話，「法式公園設計較複雜」，暫時用塑膠擺設展示設計，公司確認設計後，先至改用真正植物。

之不過，二〇〇七年移走歐式庭園，改為貝沙灣第六期Bel-Air No.8示範單位。示範清拆後，改為草坪同樹木。

二〇〇七年九月廿八號，上空舉行「幻彩耀貝沙」煙花匯演，歷時十八分鐘，為首個喺南區舉行嘅煙花匯演。

二〇〇九年七月，園西面加設「數碼港互動遊樂場」，有三個創新遊樂設施──SmartUs遊戲組合、旋轉輪，以及兩個小型足球場。

《2019年至2020年度香港政府財政預算案》中，政府宣布預留五十五億圓，發展數碼港第五期，選址為數碼港商場對開公園，而四億幾圓用來翻新公園做永久休憩空間。