新圍 (龍躍頭)
新圍又叫覲龍圍，喺香港新界粉嶺龍躍頭，係龍躍頭鄧族聚居嘅圍村，係龍躍頭「五圍六村」之一。圍村門樓喺1988年被評為香港法定古蹟，圍牆同更樓則喺1993年被評為法定古蹟。
史 編輯
龍躍頭鄧族係由錦田鄧族分支出嚟，據聞喺14世紀已經喺度起村，圍村門樓嘅石額刻住「覲龍乾隆甲子歲」字樣，所以圍牆可能喺嗰年（乾隆甲子年，即1744年）先至起。
結構 編輯
覲龍圍四面用磚牆環繞，大約四米高，用青磚砌成，牆身有鎗孔，四角起咗更樓，供看守之用，門樓喺北面，係獨特嘅兩進式建築結構，外圍用磨平青麻石砌成，樓頂有四正脊成船形裝飾，圍門裝咗連環鐵門，並且有對聯寫住「覲龍綿世澤 郡馬著家聲」。原本有護城河圍住條村，但而家已填平做咗停車場。圍裏面布局基本依舊，正中主巷盡頭係神壇，供奉文武二帝，同正門相對。圍裏面啲舊屋已經拆咗，起咗新型村屋。