J-pop

J-pop（日文：ジェーポップ）係指日本嘅流行音樂，包括有搖滾、現代R&B、電音、Hip Hop等等。

日本流行音樂
曲風起源	日本傳統音樂、搖滾、舞曲、現代節奏藍調、流行電音、嘻哈音樂等
文化起源	1960年代源自日本；現今形式喺1980年代末期奠定
典型樂器	歌唱、結他、爵士鼓、電貝斯、鍵盤樂器、鋼琴、取樣器、合成器等

J-pop喺廣義上，可包括昭和初期受當時西方流行音樂影響而出現嘅歌謠曲，甚至係起源於明治時代嘅演歌；狹義上就指1980年代末期誕生嘅「J-pop」（或稱JPOP）概念。「J-pop」係由1988年開播嘅音樂專門電台J-WAVE命名，係當時為定義日本出產嘅流行音樂而創造出來嘅和製英語用詞，來自英文「Japanese pop」嘅縮寫；其後喺日本被廣泛用來指受西方影響嘅現代音樂流派，主要包括大眾流行、R&B、靈魂樂、搖滾樂、舞曲、嘻哈、流行電音等。此外，都有日本獨自發展出來嘅J-pop分支，好似澀谷系同City pop。

截至2020年，以J-pop爲主嘅日本音樂產業仍然係世界第二大嘅音樂市場（包括實體唱片、數碼音樂、音樂串流、版稅），僅次於美國之後。憑藉日本發展成熟嘅文化產業，現今嘅日本流行音樂同韓國流行音樂、華語流行音樂並列為喺亞洲具有指標性嘅流行音樂類別，係構成當今日本流行文化嘅重要元素，亦係推動佢發展嘅原動力之一。近年，由於日本嘅實體唱片銷量減少，J-pop嘅整體市場規模呈縮小趨勢。亦有評論指出，同周邊亞洲國家相比，日本嘅音樂業界仍然依賴實體唱片作爲主要發行媒介，銷售方式過渡到數碼音樂同音樂串流嘅進度比較緩慢。