日本維新會

  呢篇文講2016年成立到而家嘅組織。想搵2012-2014年存在嘅同名組織嘅話，請睇日本維新會 (2012-2014年)。

日本維新會（日文：日本維新の会；英文：Japan Innovation Party）係日本嘅一個政黨，簡稱維新會。維新會標榜自己嘅立場係改革保守，依家嘅黨代表係馬場伸幸。維新會嘅起源係大阪維新會，所以維新會一直喺大阪，以至近畿地方有好高嘅支持度。

黨史

2010年4月19號，當時嘅大阪府知事橋下徹同埋當地一啲有志一同嘅議員組成咗大阪維新會，呢個就係日本維新會嘅母體。到2011年，大阪維新會第一次參選地方選舉就大有斬獲，為佢哋向國政選舉進發打咗支強心針。2012年，大阪維新會決定參加呢年舉行嘅眾議院選舉，先後同日本創新黨、太陽黨合併，加強大阪以外嘅勢力，最後維新會成為眾議院第三大黨。不過兩年後，黨內大老石原慎太郎同橋下徹因為立場唔同而分裂，橋下嗰一邊就成立咗維新黨。又過咗年幾（2015年），維新黨又因為係咪要同民主黨、共產黨呢啲左翼政黨合作而分裂，反對嘅一方（例如橋下徹等人），就成立咗依家嘅日本維新會。不過初時個名叫做「おおさか維新の会」，中文即係「大阪維新會」，到2016年8月改做依家個名。

2017年7月，東京都舉行知事同議會選舉，由自民黨退黨參選嘅小池百合子當選知事一職，而佢所帶領嘅都民第一會亦都喺議會入面大勝，掀起一陣「小池旋風」。當時維新會未有明確支持小池，喺議會選舉就喺苦戰下守住一席。另一方面，執政自民黨喺東京都一戰大敗，開始感覺到有執政壓力。到9月25號，自民黨以北韓飛彈威脅為由解散國會。呢次選舉，維新會就同小池臨急臨忙成立嘅希望之黨結盟，講好咗希望之黨唔會喺維新會地頭──大阪參選，而維新會亦都唔會喺希望之黨地頭──東京參選。不過，今次選舉結果唔係太好，維新會喺地頭大阪由14席跌到11席，普遍認為同維新會冇咗橋下領導、同希望之黨合作效果唔好、新成立嘅立憲民主黨扯走一部分票都有關。

2021年，維新會喺嗰年嘅眾議院選舉入面大勝，有41席，喺大阪更加攞到19區當中嘅15區（剩低4區係公明黨出選嘅選區，維新會有默契唔會派人出選），一躍成為眾議院第三大黨。

2022年黨代表松井一郎宣佈，喺2023年大阪市長任期完咗之後就會退出政壇，並且喺7月參議院選舉之後就辭任黨代表。遺缺有3個人競爭，包括馬場伸幸、足立康史同梅村美穗。一開始馬場嘅提名人數已經有306人，領先另外兩個人好多，最後馬場以大比數差距當選新任黨代表。