小池百合子

  呢篇文章講嘅係東京都知事小池百合子。想搵其他都叫百合子嘅人，請睇「百合子 (搞清楚)」。

小池百合子（日文：小池 百合子／こいけ ゆりこ ^{Koike Yuriko}；1952年7月15號—）係日本政治人，新聞主播出身，係現任東京都知事，係日本第一個做到爾個位嘅女人。依家佢屬於都民第一會同埋希望之黨。

小池 百合子

佢曾經做過內閣環境大臣、防衛大臣，重係日本第一個女性防衛大臣。

佢識得講阿拉伯文同埋英文，重曾經係日本阿拉伯協會（日本アラブ協会）嘅顧問。

從政經歷

1992年，當時喺電視台做嘢嘅小池百合子加入由細川護熙成立嘅日本新黨，更加喺參議院選舉入面當選，第一次成為議員。之後冇耐，日本社會黨等嘅反對黨發起對當時首相宮澤喜一嘅不信任動議，議案喺某啲自民黨議員倒戈之下通過，眾議院提前解散，小池百合子同細川護熙轉戰參議院，兩個都成功當選，選後日本新黨加入非自民黨、共產黨聯合政權，細川護熙重做咗首相，而小池百合子就出任總務政務次官，不過聯合政權好快就倒咗台。

1995年，日本新黨在內嘅幾個政黨合併做新進黨，小池百合子亦都跟住加入，到1998年，新進黨解散，小池加入小澤一郎成立嘅自由黨。

1999年，自由黨加入自民黨政權共同執政，小池第二次入閣。年尾，自民黨搵埋公明黨入閣，因為聯合政權就算冇咗自由黨都可以過半，小澤覺得自由黨喺政府入面會被邊緣化，所以就同自民黨傾將兩個黨合併，但係佢哋傾唔埋欄，於是自由黨就脫離聯合政府，不過海部俊樹、小池百合子等人唔想走，所以另立保守黨，留喺政府入面。響2002年，小池加入自民黨。

2004年嘅小池

2003年，當時首相小泉純一郎改組內閣，小池第一次擔正做環境大臣。到2005年，自民黨內部因為郵政民營化鬧分歧，小泉更加不惜解散國會嚟「清理門戶」，自民黨中央除咗唔提名反對郵政民營化法案嘅議員，重要派人去狙擊佢哋，小池百合子就係其中一個去狙擊反郵政派議員嘅人，佢由本身喺兵庫縣嘅選區轉到東京出選，最後贏埋原議員小林興起，成功連任。

到2007年，小池百合子出任防衛大臣，雖然得個零月貨仔，但就係第一個女性出任呢個職位。

2008年，小池參選自民黨總裁選舉，係第一個女人參選，若然佢贏到選舉，咁就代表住日本會出現第一個女首相（自民黨當期時係執政黨，首相通常都係執政黨領袖去做），但係佢喺呢次選舉輸咗畀麻生太郎，喺五個候選人入面排第三。2009年，自民黨受住求變嘅風潮衝擊，選舉陷入苦戰，最後民主黨擊敗自民黨，實現政權交替。小池亦都喺自己嘅選區輸畀民主黨嘅候選人，好彩靠住比例區「復活」當選。到2012年，小池打低民主黨候選人當選。

2016年，當時嘅東京都知事舛添要一因為貪污事件而辭職，觸發補選，小池決定參選。開頭小池參加自民黨黨內初選，但係佢批評自民黨嘅東京都支部「黑箱作業」，於是小池退出初選，改為獨立出選。最後佢喺自民黨支持嘅增田寬也同在野黨聯合推薦嘅鳥越俊太郎夾擊之下，以44%得票率當選，成為第一個女性東京都知事。之後，佢成立都民第一會，為嚟緊嘅東京都議會改選鋪路。2017年7月嘅東京都議會選舉，小池嘅「都民第一會」同公明黨合作，結果大勝，都民第一會攞到49席，公明黨23人全數當選，連同都民會推薦嘅6個獨立候選人，親小池勢力一舉贏到78席，肯定可以控制都議會，小池呢一次成功，為執政自民黨帶嚟好大嘅危機感。

到同年9月，首相安倍晉三因為北韓試射導彈嘅威脅，民望回升，而且小池羽翼未豐、主要在野黨民進黨民望又低落，喺呢個時間舉行大選對自民黨最有利。9月25號，小池成立咗希望之黨，不過希望之黨因為成立冇耐，根本冇咁多人參選，於是民進黨主動向小池「借人」，希望小池嘅高人氣可以幫助民進黨嘅議員連任，不過民進黨原先係想小池可以照單全收所有人，點知小池只係揀一啲理念相同嘅民進黨人入黨，導致民進黨嘅自由派不滿，於是另立立憲民主黨，在野力量整合失敗，加埋小池到最後都冇出戰眾議院，拉抬效果又再打折扣，而投票當日，小池竟然唔喺日本，而係走咗去法國訪問，結果執政聯盟繼續大勝，希望之黨得返50席（選前有57席），最大在野黨地位俾立憲民主黨攞埋，小池承認今次選舉係「完敗」，小池喺11月重辭埋希望之黨黨首嘅位，話要專注都政。2018年5月，希望之黨同民主黨合併做國民民主黨，但小池冇加入。

2020年7月，小池爭取連任東京都知事，今次小池輕鬆贏咗宇都宮健兒、山本太郎、小野泰輔等21個對手，成功連任。

屋企

小池百合子嘅老豆本身係做石油貿易生意，不過後來佢生意失敗破咗產。佢又試過選議員，但係輸咗。

小池百合子喺22歲就結過婚，對方都係喺開羅讀書嘅日本留學生，不過3年之後因為志向唔同而離咗婚，之後佢都冇再結婚。小池試過同小泉純一郎傳出緋聞，甚至話兩個人已經去到談婚論嫁嘅階段，2006年，小池喺屋企暈低，畀人送去醫院，但係雜誌《週刊新潮》爆料話小池其實係𠝹手殉情。