會戰

  想搵第二個意思嘅話，請睇會戰 (搞清楚)。

會戰（粵拼：wui6 zin3；英文：pitched battle）係一種戰役類型，由兩陣嘅陸軍（包括敵對雙方同埋友軍）集合兵力對打，係規模好大嘅戰役，會戰發生喺特定嘅時間同地點。

常德會戰

概要

會戰嘅爆發係要經過雙方準備嘅，所以啲散兵短兵相接，就唔叫會戰，因爲佢哋係偶然撞見先有嘅細規模戰鬥。同時會戰係要雙方揀個時間、地點打過，如果有一方來唔切備戰、被迫應戰噉都唔叫會戰，比如話一啲攻城戰。舉個例，英國內戰嘅第一場會戰係伊珠丘戰役，呢場戰役就係保皇派同議會派集合兵力後打嘅激烈會戰。而會戰可以由最初嘅短兵相接發展而來，比如美國內戰嘅蓋茨堡之役，最初時就係兵家路窄，兩方指揮官決定退守敵對，最終演變成會戰。

一般來講，會戰嘅目的係要將對方全殲，最起碼要擊潰對方、打擊佢嘅有生力量，所以會戰嘅規模好大，亦好激烈，就近代以來軍制，打場會戰所需軍力去到軍以上。打會戰係要揀過地方，入面就有動機。一般來講打會戰唔會揀地形複雜嘅地方，因爲噉樣唔方便打場大仗，但係就好適合打遊擊戰。喺近代之前，會戰係相比遭遇戰、前哨戰緊要嘅大戰，不過隨住軍事思想、武器變化發展，會戰嘅意義、頻率已經降低。

史

喺出現近世嗰種可以調動一切資源嘅國家戰時體制之前，國家領導者使得嘅戰力好有限。因爲會戰嘅目的係要將敵手嘅軍力徹底擊滅，所以會戰係對戰爭形勢好大影響嘅戰役，有時甚至決定結局。既然戰力有限而會戰緊要，受制限戰爭思想影響，會戰時唔求完全消滅對手、片甲不留，達到想要嘅效果就好收，所以就算身處下風甚至劣勢都好，只要敵手未得逞、自己嘅有生力量重保得住，噉都算係贏咗場會戰。

19世紀之前，會戰喺指揮官心目中依然係好緊要嘅大戰，嗰陣時一般會戰浄打一日，時間唔長。不過之後出現國家戰時體制，於是兵力大增，武器亦先進過舊日，戰區亦大過過往。到一戰時，戰綫蔓延，結果會戰嘅時間明顯延長，甚至乎變成持久戰，不過當時重係習慣將大規模嘅戰役嗌做會戰。

到現代，戰爭更講求機動，而會戰呢種正面衝突嘅陣地戰相比無咁靈活，所以大規模嘅會戰越來越少見。

睇埋

• 陸戰
• 遭遇戰
• 會戰分

參攷資料

• "Policy of the Protectionists". Blackwood's Edinburgh Magazine. 71 (440): 645–68. 1852.