朱健
提示：呢篇文講嘅唔係豬腱。生平 編輯
朱健喺1969年3月30號喺中國大陸出世，1974年去咗澳門定居；1986年喺濠江中學畢業，第二年去咗葡萄牙升學，喺里斯本大學文學院讀「葡萄牙語言及文化」課程，兩年後考入葡萄牙天主教大學法學院法律系，1994年畢業；之後返澳門，喺澳門大學讀法學碩士。
朱健喺1996年10月2號開始做澳門第一審法院法官，成為澳門史上第一位中國籍法官；1999年12月20號澳門特別行政區成立，朱健被委任為澳門終審法院法官。喺呢段期間，處理過2000年澳門大賽車衝出賽道意外賠償上訴案、尹國駒上訴案同埋歐文龍貪污案等等。
2011年8月26號，朱健放假同屋企人去台山自駕遊，期間因為爆軚而失控撞埋路邊，朱健傷及腦幹而昏迷，9月初轉到廣州繼續醫。11月11號，終審法院健康檢查委員會認為朱健「長期絕對無擔任公共職務能力」，法官委員會宣告朱健一定要強制離職退休。11月22號凌晨2點45分，朱健救治無效不治，終年42歲，遺體喺27號送返澳門治喪。