李我
李我（1922年2月16號—2021年5月5號[1]），原名李晚景，又名李耀景、李國祥，係香港播音員，活躍於戰後1940年代至1970年代，先後任職廣州風行電台、澳門綠邨電台、香港麗的呼聲同香港商業電台。1946年始創廣播劇《天空小說》，風行省港澳，聲演卅年，深受粵港聽眾歡迎[2]。
| 李我 | |
|---|---|
| 出生日 | 1922年  |
| 出生地 | 廣州 |
| 死亡日 | 2021年5月5號 |
| 死亡地 | 香港 |
| 國籍 | 香港 |
| 母校 | 香港華仁書院 |
| 職業 | broadcaster、作家、演員 |
[改維基數據] | |
生平 編輯
李我喺香港長大，祖籍廣東江門市新會區。佢媽媽葉靄雲本身係中醫師，祖籍江西。
李我自細已經跟亞媽學唱粵曲，十三歲跟導演湯曉丹學編劇。其時戰亂頻繁，李我十幾歲開始已經喺粵港地區工作，同廿幾位同伴自組「新春秋劇團」到廣州演出[3][4]。當時廣州風行電台台長，喺戲棚聽到李我嘅粵劇表演，就請佢擔任廣播劇主持，初試啼聲。
佢喺香港華仁書院畢業。1945年曾經短暫入讀廣州嶺南大學政法系，但未有畢業[註 1]。1946年創作《天空小說》轟動省城[5]。
1949年，香港麗的呼聲重金禮聘李我加盟，一年間訂戶增加六倍[6]。佢喺麗的呼聲只做咗一年半，由1949年11月至1951年6月，因為人事問題同自己作品嘅分帳問題，同麗的呼聲鬧得好唔愉快，於是唔再續約，1951年9月1號跳糟至澳門綠村電台。點知上任約一個月，就因為佢嘅天空小說《不夜天》被指影射澳門某勢力人物，《不夜天》被腰斬。李我憤而離職，轉行喺旺角花園街經營中藥舖同服裝舖。
但舖頭生意兩年嚟都無起色。正當佢對前景憂慮之際，麗的呼聲嘅舊同事鄺天培同林國楷嚟搵佢，問佢重有冇興趣從事廣播。原來呢兩年間，廣播業已起咗變化，澳門嘅綠村電台有咗新股東，就係後嚟做咗香港商業電台老闆嘅何佐芝。根據綠村電台老臣子梁送風嘅回憶文章指，何佐芝入股之後，電台改名為澳門綠邨商業廣播電台，於1955年起全面革新。鄺天培同林國楷搵李我時，都已經離開咗麗的呼聲，準備投入呢間電台。經佢哋介紹，李我都成為咗呢間電台嘅一員，再次投身廣播行業。兩年後，何佐芝投得香港商業電台牌照，就拉隊離開，喺香港大展拳腳，商台正式喺1959年8月啟播[7]。
佢以李我為藝名，原因係：「當時想到自己無父、無母、無兄、無弟、無妻，只有一個我，所以就改咗單名一個我字」[8]。
李我個仔李蔭宗喺1974年夾埋幾名好友綁架當年20歲嘅新加坡國立大學女學生郭瑞燕，被判監兩年半[9]。
晚年及逝世 編輯
李我喺晚年入住安老院，佢老婆蕭湘同好友劉天賜仍然有不時探望。直至2021年5月5號下晝約一點半喺將軍澳醫院離世，享年99歲[10]，消息由劉天賜喺佢Facebook個人帳號對外宣佈[11]。
註 編輯
參考 編輯
- ↑ 〈廣播界一代宗師李我離世 享年99歲〉. 頭條新聞. 2021年5月5號. 原著喺2021年5月5號歸檔. 喺2021年5月6號搵到.
- ↑ 〈《天空小說》前傳後記──李我．蕭湘〉 互聯網檔案館嘅歸檔，歸檔日期2016年6月10號，.，長者安居協會《長訊 互聯網檔案館嘅歸檔，歸檔日期2016年4月1號，.》，2012年9月。
- ↑ 台灣之音：李我專訪 〈存档副本〉. 原著喺2021年5月5號歸檔. 喺2021年5月5號搵到.
- ↑ 吳兆剛：〈天空小說與其他藝術媒介的互相影響〉，梁秉鈞主編：《創意寫作系列：書寫香港@文學故事》(香港：香港教育圖書公司，2008年)，頁146-150。
- ↑ 〈書展再講古 道盡香港變遷〉 互聯網檔案館嘅歸檔，歸檔日期2017年5月24號，.，《蘋果日報》，2013年7月6號。
- ↑ 香港廣播七十五年：演講廳－口述歷史坐談會－天空小說與廣播劇 [1] 互聯網檔案館嘅歸檔，歸檔日期2016年3月4號，.
- ↑ 〈香港蘋果日報 - 昔日搭飛機嘆茶，今家財散盡。李我住公屋有段古〉. 原著喺2016年6月3號歸檔. 喺2021年5月6號搵到.
- ↑ 香港電台:香港廣播七十年 [2] 互聯網檔案館嘅歸檔，歸檔日期2016年10月14號，.
- ↑ 〈有辱家聲〉. 《山寨探案實錄》. 喺2021年5月5號搵到.
- ↑ 〈香著名資深播音員李我逝世 享年99歲〉. 《商業電台新聞》. 2021年5月5號.
- ↑ 〈香港廣播界開山祖師李我逝世 享年 99 歲〉. 《立場新聞》. 2021年5月5號. 原著喺2021年6月24號歸檔. 喺2022年1月12號搵到.
連出去 編輯
- 文化樹下 —— 我們的廣播人：《李我蕭湘》 - 香港電台